ਓਟਵਾ: ਕੈਨੇਡਾ ਦੇ ਲੱਖਾਂ ਕੈਨੇਡਾ ਵਾਸੀਆਂ ਨੂੰ 5 ਜੁਲਾਈ ਤੋਂ ਗਰੌਸਰੀ ਰਿਆਇਤ ਵਜੋਂ ਡਾਲਰ ਮਿਲਣੇ ਸ਼ੁਰੂ ਹੋ ਜਾਣਗੇ। ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਇਹ ਐਲਾਨ ਬਿਲ ਸੀ-46 ਨੂੰ ਪ੍ਰਵਾਨਗੀ ਮਿਲਣ ਤੋਂ ਬਾਅਦ ਕੀਤਾ। ਕੋਸਟ ਆਫ਼ ਲਿਵਿੰਗ ਐਕਟ ਅਧੀਨ ਦੋ ਬੱਚਿਆਂ ਵਾਲੇ ਕੈਨੇਡੀਅਨ ਪਰਿਵਾਰ ਨੂੰ 467 ਡਾਲਰ ਤੱਕ ਦੀ ਰਕਮ ਮਿਲੇਗੀ ਜਦਕਿ ਇਕ ਬੱਚੇ ਵਾਲੀ ਸਿੰਗਲ ਮਦਰ 386 ਡਾਲਰ ਦੀ ਹੱਕਦਾਰ ਹੋਵੇਗੀ। ਇਸ ਤਰ੍ਹਾਂ ਬਗੈਰ ਬੱਚੇ ਵਾਲੇ ਸਿੰਗਲ ਕੈਨੇਡੀਅਨ ਨੂੰ 234 ਡਾਲਰ ਮਿਲਣਗੇ।
ਉੱਥੇ ਹੀ ਦੂਜੇ ਪਾਸੇ ਬਜ਼ੁਰਗਾਂ ਨੂੰ 225 ਡਾਲਰ ਮਿਲਣਗੇ ਤੇ ਇਹ ਰਕਮ ਸਿੱਧੀ ਬੈਂਕ ਖਾਤਿਆਂ ‘ਚ ਪਹੁੰਚੇਗੀ ਜਾਂ ਕੈਨੇਡਾ ਰੈਵੇਨਿਊ ਏਜੰਸੀ ਵੱਲੋਂ ਚੈੱਕ ਭੇਜੇ ਜਾਣਗੇ। ਸਿੰਗਲ ਮਦਰ ਦੇ ਮਾਮਲੇ ‘ਚ ਸਾਲਾਨਾ ਆਮਦਨ ਹੱਦ 30,000 ਡਾਲਰ ਤੈਅ ਕੀਤੀ ਗਈ ਹੈ ਜਦਕਿ ਇਕੱਲੇ ਬਜ਼ੁਰਗ ਦੇ ਮਾਮਲੇ ਵਿਚ ਆਮਦਨ ਹੱਦ 20,000 ਡਾਲਰ ਸਾਲਾਨਾ ਤੈਅ ਕੀਤੀ ਗਈ ਹੈ। ਘੱਟ ਅਤੇ ਦਰਮਿਆਨੇ ਆਮਦਨ ਵਾਲੇ ਕੈਨੇਡਾ ਵਾਸੀਆਂ ਨੂੰ ਗਰੋਸਰੀ ਰਿਆਇਤ ਲਈ ਕੋਈ ਅਰਜ਼ੀ ਦਾਖਲ ਕਰਨ ਦੀ ਜ਼ਰੂਰਤ ਨਹੀਂ ਅਤੇ ਇਹ ਜੀ.ਐਸ.ਟੀ. ਕਰੈਡਿਟ ਪੇਮੈਂਟ ਦੇ ਨਾਲ ਅਦਾ ਕਰ ਦਿੱਤੀ ਜਾਵੇਗੀ।
ਵਿੱਤ ਮੰਤਰੀ ਕ੍ਰਿਸਟੀਆ ਫਰੀਲੈਂਡ ਨੇ ਕਿਹਾ ਕਿ ਮਹਿੰਗਾਈ ਦਰ ‘ਚ ਲਗਾਤਾਰ 9 ਮਹੀਨੇ ਵਾਧਾ ਹੋਣ ਤੋਂ ਬਾਅਦ ਫੈਡਰਲ ਸਰਕਾਰ ਨੇ ਲੋਕਾਂ ਨੂੰ ਰਾਹਤ ਦੇਣ ਦਾ ਫੈਸਲਾ ਕੀਤਾ, ਜਿਸ ਤਹਿਤ 2023 ਦੇ ਬਜਟ ‘ਚ ਗਰੋਸਰੀ ਰਿਆਇਤ ਦਾ ਐਲਾਨ ਹੋਇਆ। ਹੁਣ ਇਸ ਨਾਲ ਸਬੰਧਤ ਬਿੱਲ ‘ਤੇ ਗਵਰਨਰ ਜਨਰਲ ਦੀ ਮੋਹਰ ਲੱਗ ਚੁੱਕੀ ਹੈ ਅਤੇ ਅਦਾਇਗੀਆਂ ਦਾ ਰਾਹ ਪੱਧਰਾ ਹੋ ਗਿਆ ਹੈ। ਇਸ ਯੋਜਨਾ ਤਹਿਤ ਸਰਕਾਰ ਵੱਲੋਂ 2.5 ਬਿਲੀਅਨ ਡਾਲਰ ਦੀ ਰਕਮ ਰਾਖਵੀਂ ਰੱਖੀ ਗਈ ਹੈ ਅਤੇ ਲੋਕਾਂ ‘ਤੇ ਕੋਈ ਬੰਦਿਸ਼ ਨਹੀਂ ਕਿ ਉਨ੍ਹਾਂ ਵੱਲੋਂ ਰਕਮ ਗਰੋਸਰੀ ਲਈ ਹੀ ਖਰਚ ਕੀਤੀ ਜਾਣੀ ਹੈ।
Disclaimer: This article is provided for informational purposes only. The information should not be taken to represent the opinions, policy, or views of Global Punjab TV, nor any of its staff, employees, or affiliates.
