ਓਟਵਾ: ਕੈਨੇਡਾ ‘ਚ ਸਿਹਤ ਸੰਭਾਲ ‘ਤੇ ਇਸ ਸਾਲ ਦੌਰਾਨ 331 ਅਰਬ ਡਾਲਰ ਖਰਚ ਹੋਣ ਦੀ ਉਮੀਦ ਹੈ ਅਤੇ ਇਹ ਰਕਮ ਮੁਲਕ ਦੇ ਕੁੱਲ ਜੀ ਡੀ ਪੀ. ਦਾ 122 ਫ਼ੀਸਦੀ ਬਣਦੀ ਹੈ। ਇਸ ਸਾਲ ਪ੍ਰਤੀ ਵਿਅਕਤੀ ਔਸਤ ਖਰਚ ਦੇ ਹਿਸਾਬ ਨਾਲ 8,653 ਡਾਲਰ ਸਿਹਤ ਸਹੂਲਤਾਂ ‘ਤੇ ਖਰਚ ਕੀਤੇ ਜਾਣਗੇ।
ਕੈਨੇਡੀਅਨ ਇੰਸਟੀਚਿਊਟ ਫਾਰ ਹੈਲਥ ਇਨਫਾਰਮੇਸ਼ਨ ਵੱਲੋਂ ਜਾਰੀ ਅੰਕੜਿਆਂ ਮੁਤਾਬਕ 2015 ਤੋਂ 2019 ਤੱਕ ਹਰ ਸਾਲ ਹੈਲਥ ਕੇਅਰ ‘ਤੇ ਹੋਣ ਵਾਲਾ ਖਰਚ ਚਾਰ ਫ਼ੀਸਦੀ ਦੇ ਹਿਸਾਬ ਨਾਲ ਵਧ ਰਿਹਾ ਸੀ ਪਰ ਮਹਾਂਮਾਰੀ ਕਾਰਨ 2020 ਦੌਰਾਨ ਅਚਾਨਕ 13 ਫ਼ੀਸਦੀ ਵਾਧਾ ਕਰਨਾ ਪਿਆ। ਇਸ ਤੋਂ ਬਾਅਦ 2021 ‘ਚ 7 ਫ਼ੀਸਦੀ ਵਾਧਾ ਦਰਜ ਕੀਤਾ ਗਿਆ ਪਰ ਇਸ ਵਾਰ ਸਿਹਤ ਸੰਭਾਲ ਖਰਚੇ ‘ਚ ਸਿਰਫ਼ 0.8 ਫ਼ੀਸਦੀ ਵਾਧਾ ਹੋਣ ਅਨੁਮਾਨ ਲਾਇਆ ਗਿਆ ਹੈ। ਹਸਪਤਾਲਾਂ, ਡਾਕਟਰਾਂ ਅਤੇ ਦਵਾਈਆਂ ‘ਤੇ ਹੋਣ ਵਾਲਾ ਖਰਚ ਕੁੱਲ ਰਕਮ ਦਾ 50 ਫ਼ੀਸਦੀ ਤੋਂ ਪਾਰ ਹੋ ਜਾਂਦਾ ਹੈ।
ਹਸਪਤਾਲਾਂ ਉਪਰ ਲਗਭਗ 25 ਫ਼ੀਸਦੀ ਖਰਚ ਹੁੰਦਾ ਹੈ ਅਤੇ 13.6 ਫ਼ੀਸਦੀ ਖਰਚ ਡਾਕਟਰਾਂ ਦੀਆਂ ਤਨਖਾਹਾਂ ‘ਤੇ ਹੁੰਦਾ ਹੈ। 13.6 ਫ਼ੀਸਦੀ ਰਕਮ ਹੀ ਦਵਾਈਆਂ ‘ਤੇ ਖਰਚ ਹੁੰਦੀ ਹੈ। ਮੌਜੂਦਾ ਸਾਲ ਦੌਰਾਨ ਦਵਾਈਆਂ ‘ਤੇ ਹੁੰਦਾ ਖਰਚਾ 5.4 ਫ਼ੀਸਦੀ ਵਧਣ ਦੀ ਸੰਭਾਵਨਾ ਪ੍ਰਗਟਾਈ ਗਈ ਹੈ। ਕੋਰੋਨਾ ਮਹਾਂਮਾਰੀ ਦੌਰਾਨ ਫੈਡਰਲ ਅਤੇ ਸੂਬਾ ਸਰਕਾਰਾਂ ਨੇ ਪਹਿਲੇ ਸਾਲ 29.3 ਅਰਬ ਡਾਲਰ ਖਰਚ ਕੀਤੇ ਜਦਕਿ ਦੂਜੇ ਸਾਲ ਖਰਚਾ ਵਧ ਕੇ 32.5 ਅਰਬ ਡਾਲਰ ਹੋ ਗਿਆ ਪਰ ਇਸ ਸਾਲ ਮਹਾਂਮਾਰੀ ਨਾਲ ਸਬੰਧਤ ਖਰਚਾ 14.5 ਅਰਬ ਡਾਲਰ ਰਹਿਣ ਦੇ ਆਸਾਰ ਹਨ।
ਕੈਨੇਡੀਅਨ ਇੰਸਟੀਚਿਊਟ ਫੌਰ ਹੈਲਥ ਇਨਫ਼ਰਮੇਸ਼ਨ ਦੇ ਅੰਕੜਿਆਂ ਮੁਤਾਬਕ ਮਹਾਂਮਾਰੀ ਨਾਲ ਸਬੰਧਤ ਜ਼ਿਆਦਾਤਰ ਖਰਚਾ ਇਲਾਜ ਉਪਰ ਹੋਇਆ ਜਦਕਿ ਵੈਕਸੀਨੇਸ਼ਨ ਦਾ ਖਰਚਾ 20 ਫ਼ੀਸਦੀ ਦਰਜ ਕੀਤਾ ਗਿਆ।
Disclaimer: This article is provided for informational purposes only. The information should not be taken to represent the opinions, policy, or views of Global Punjab TV, nor any of its staff, employees, or affiliates.
