ਅੰਮ੍ਰਿਤਸਰ : ਸਿੱਖਿਆ ਦੇ ਮਾਮਲੇ ਨੂੰ ਲੈ ਕੇ ਪੰਜਾਬ ਦੀ ਸਿਆਸਤ ਲਗਾਤਾਰ ਭਖੀ ਹੋਈ ਹੈ। ਇਸ ਸਭ ਦੇ ਦਰਮਿਆਨ ਮੁੱਖ ਮੰਤਰੀ ਚਰਨਜੀਤ ਚੰਨੀ ਵਲੋਂ ਅੰਮ੍ਰਿਤਸਰ ‘ਚ ਪੈਂਦੇ ਵਡਾਲਾ ਭਿੱਟੇ ਵੱਢ ਪਿੰਡ ਦੇ ਸਰਕਾਰੀ ਸਕੂਲ ਵਿਚ ਅਚਨਚੇਤ ਪਹੁੰਚ ਕੇ ਚੈਕਿੰਗ ਕੀਤੀ ਗਈ। ਇਸ ਦਰਮਿਆਨ ਮੁੱਖ ਮੰਤਰੀ ਵਲੋਂ ਜਿੱਥੇ ਸਕੂਲ ਪ੍ਰਬੰਧਕ ਦਾ ਜਾਇਜ਼ਾ ਲਿਆ ਗਿਆ, ਉਥੇ ਹੀ ਉਨ੍ਹਾਂ ਅਧਿਆਪਕਾਂ ਅਤੇ ਵਿਦਿਆਰਥੀਆਂ ਨਾਲ ਵੀ ਗੱਲਬਾਤ ਕੀਤੀ। ਜਮਾਤਾਂ ‘ਚ ਜਾ ਕੇ ਬੱਚਿਆਂ ਨੂੰ ਮਿਲੇ ਤੇ ਉਨ੍ਹਾਂ ਤੋਂ ਪਹਿਲਾ ਸਵਾਲ ਇਹ ਪੁੱਛਿਆ ਕਿ ‘ਜਾਣਦੇ ਓ, ਮੈਂ ਕੌਣ ਆਂ।’
ਵਿਦਿਆਰਥੀਆਂ ਨਾਲ ਉਨ੍ਹਾਂ ਹੱਥ ਮਿਲਾਇਆ ਤੇ ਉਨ੍ਹਾਂ ਤੋਂ ਪੁੱਛਿਆ ਕੇ ਸਟਾਫ ਚੰਗੀ ਤਰ੍ਹਾਂ ਪੜ੍ਹਾਉਂਦਾ ਹੈ ਜਾਂ ਨਹੀਂ। ਕੋਈ ਅਧਿਆਪਕ ਛੁੱਟੀਆਂ ਤਾਂ ਨਹੀਂ ਕਰਦਾ। ਇਸ ਤੋਂ ਬਾਅਦ ਉਹ ਸਿੱਧੇ ਪ੍ਰਿੰਸੀਪਲ ਦਫ਼ਤਰ ਪਹੁੰਚੇ ਤੇ ਹਾਜ਼ਰੀ ਰਜਿਸਟਰ ਚੁੱਕ ਕੇ ਸਟਾਫ ਬੁਲਾ ਲਿਆ। ਸੀਐੱਮ ਦੇ ਸਹਿਯੋਗੀਆਂ ਨੇ ਪੂਰੇ ਸਟਾਫ ਦੀ ਹਾਜ਼ਰੀ ਲਗਾਈ। ਦੋ ਅਧਿਆਪਕ ਸਕੂਲ ‘ਚ ਨਹੀਂ ਸਨ, ਜਿਨ੍ਹਾਂ ਵਿਚੋਂ ਇਕ ਦੀ ਇਲੈਕਸ਼ਨ ਡਿਊਟੀ ਸੀ। ਦੂਸਰੇ ਨੂੰ ਦਫ਼ਤਰੀ ਕੰਮ ਤੋਂ ਭੇਜਿਆ ਗਿਆ ਸੀ।
ਸੀਐੱਮ ਨੇ ਬੱਚਿਆਂ ਦੇ ਮਿਡ-ਡੇਅ ਮੀਲ ਦਾ ਕਿਚਨ ਦੇਖਿਆ। ਉੱਥੇ ਖਾਣਾ ਕਿਵੇਂ ਬਣ ਰਿਹਾ ਹੈ ਤੇ ਸਾਫ-ਸਫ਼ਾਈ ਦੇ ਕੀ ਹਾਲਾਤ ਹਨ, ਇਸ ਦੀ ਵੀ ਜਾਂਚ ਕੀਤੀ। ਇਸ ‘ਤੇ ਉਨ੍ਹਾਂ ਸੰਤੁਸ਼ਟੀ ਜ਼ਾਹਿਰ ਕੀਤੀ। ਉਨ੍ਹਾਂ ਪ੍ਰਿੰਸੀਪਲ ਦਾ ਧੰਨਵਾਦ ਕੀਤਾ ਕਿ ਉਹ ਚੰਗੀ ਤਰ੍ਹਾਂ ਸਕੂਲ ਸੰਭਾਲ ਰਹੀ ਹਨ।
