ਵਾਸ਼ਿੰਗਟਨ: ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਨਵੇਂ ਨਿਯਮਾਂ ਨੇ ਵਿਸ਼ਵ ਵਪਾਰ ਨੂੰ ਪ੍ਰਭਾਵਿਤ ਕੀਤਾ ਹੈ। ਜਾਪਾਨ, ਤਾਈਵਾਨ ਅਤੇ ਕਈ ਯੂਰਪੀਅਨ ਦੇਸ਼ਾਂ ਦੀਆਂ ਡਾਕ ਸੇਵਾਵਾਂ ਨੇ ਵੱਡੇ ਸੀਮਾ ਸ਼ੁਲਕ ਬਦਲਾਅ ਤੋਂ ਬਾਅਦ ਅਮਰੀਕਾ ਨੂੰ ਭੇਜੇ ਜਾਣ ਵਾਲੇ ਛੋਟੇ ਪਾਰਸਲਾਂ ‘ਤੇ ਰੋਕ ਲਗਾ ਦਿੱਤੀ ਹੈ। ਅਮਰੀਕਾ ਦਾ ਇਹ ਨਵਾਂ ਨਿਯਮ ਇੰਨਾ ਜਟਿਲ ਹੈ ਕਿ ਯੂਰਪ ਦੀਆਂ ਡਾਕ ਕੰਪਨੀਆਂ ਇਸ ਨੂੰ ਸਮਝਣ ਵਿੱਚ ਅਸਮਰੱਥ ਹਨ। ਇਸ ਉਲਝਣ ਕਾਰਨ ਕਈ ਕੰਪਨੀਆਂ ਨੇ ਅਮਰੀਕਾ ਨੂੰ ਜਾਣ ਵਾਲੀਆਂ ਆਪਣੀਆਂ ਡਾਕ ਸੇਵਾਵਾਂ ਮੁਅੱਤਲ ਕਰ ਦਿੱਤੀਆਂ ਹਨ।
CNBC ਦੀ ਰਿਪੋਰਟ ਅਨੁਸਾਰ, ਇਹ ਰੋਕ ਟਰੰਪ ਦੇ ਉਸ ਹੁਕਮ ਨਾਲ ਜੁੜੀ ਹੈ, ਜਿਸ ਨੇ 800 ਡਾਲਰ ਤੋਂ ਘੱਟ ਮੁੱਲ ਦੇ ਵਿਦੇਸ਼ੀ ਪਾਰਸਲਾਂ ਲਈ ਘੱਟੋ-ਘੱਟ ਟੈਕਸ ਛੋਟ ਨੂੰ ਖਤਮ ਕਰ ਦਿੱਤਾ ਹੈ। ਇਹ ਨਿਯਮ ਸਿਰਫ ਚੀਨ ‘ਤੇ ਹੀ ਨਹੀਂ, ਸਗੋਂ ਸਾਰੇ ਦੇਸ਼ਾਂ ‘ਤੇ ਲਾਗੂ ਹੁੰਦਾ ਹੈ।
ਪਹਿਲਾਂ ਬਿਨਾਂ ਟੈਕਸ ਦੇ ਜਾਂਦੇ ਸਨ ਛੋਟੇ ਪਾਰਸਲ
ਪਹਿਲਾਂ 800 ਡਾਲਰ (ਲਗਭਗ 67,000 ਰੁਪਏ) ਤੋਂ ਸਸਤੇ ਵਿਦੇਸ਼ੀ ਪਾਰਸਲ ਅਮਰੀਕਾ ਵਿੱਚ ਬਿਨਾਂ ਕਿਸੇ ਟੈਕਸ ਜਾਂ ਵਧੇਰੇ ਜਾਂਚ ਦੇ ਭੇਜੇ ਜਾ ਸਕਦੇ ਸਨ। ਹੁਣ ਟਰੰਪ ਪ੍ਰਸ਼ਾਸਨ ਨੇ ਇਹ ਛੋਟ ਖਤਮ ਕਰ ਦਿੱਤੀ ਹੈ। ਹਰ ਛੋਟੇ-ਵੱਡੇ ਪਾਰਸਲ ‘ਤੇ ਟੈਕਸ ਲੱਗੇਗਾ ਅਤੇ ਉਸ ਦੀ ਪੂਰੀ ਜਾਂਚ ਹੋਵੇਗੀ।
ਇਸ ਦੇ ਨਤੀਜੇ ਵਜੋਂ ਕਈ ਦੇਸ਼ਾਂ ਦੀਆਂ ਡਾਕ ਸੇਵਾਵਾਂ ਅਜਿਹੇ ਪਾਰਸਲਾਂ ਨੂੰ ਰੋਕ ਰਹੀਆਂ ਹਨ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਉਨ੍ਹਾਂ ਦਾ ਸਿਸਟਮ ਨਵੇਂ ਨਿਯਮਾਂ ਮੁਤਾਬਕ ਨਹੀਂ ਚੱਲ ਸਕਦਾ ਅਤੇ ਵਾਹਕਾਂ ਨੂੰ ਨਹੀਂ ਪਤਾ ਕਿ ਸ਼ੁਲਕ ਦੀ ਗਣਨਾ ਕਿਵੇਂ ਕੀਤੀ ਜਾਵੇਗੀ, ਇਸ ਨੂੰ ਕੌਣ ਵਸੂਲ ਕਰੇਗਾ ਜਾਂ ਇਹ ਜਾਣਕਾਰੀ ਅਮਰੀਕੀ ਅਧਿਕਾਰੀਆਂ ਤੱਕ ਕਿਵੇਂ ਪਹੁੰਚਾਈ ਜਾਵੇਗੀ।
ਭਰਮ ਫੈਲਣ ਤੋਂ ਬਾਅਦ DHL, ਕੋਰੀਓਸ ਅਤੇ ਲਾ ਪੋਸਟ ਨੇ ਡਾਕ ਰੋਕੀ
ਪਾਰਸਲ ਸਰਵਿਸ DHL ਨੇ ਸ਼ੁੱਕਰਵਾਰ ਨੂੰ ਬਿਆਨ ਜਾਰੀ ਕਰਕੇ ਸਪੱਸ਼ਟ ਕੀਤਾ ਕਿ ਡਾਇਚੇ ਪੋਸਟ ਅਤੇ DHL ਪਾਰਸਲ ਜਰਮਨੀ ਨੇ ਅਮਰੀਕਾ ਜਾਣ ਵਾਲੇ ਪਾਰਸਲ ਲੈਣੇ ਬੰਦ ਕਰ ਦਿੱਤੇ ਹਨ। ਕੰਪਨੀ ਨੇ ਕਿਹਾ, “ਕੁਝ ਅਹਿਮ ਸਵਾਲ ਅਜੇ ਵੀ ਅਨਸੁਲਝੇ ਹਨ, ਖਾਸਕਰ ਭਵਿੱਖ ਵਿੱਚ ਟੈਕਸ ਕਿਵੇਂ ਅਤੇ ਕਿਸ ਦੁਆਰਾ ਵਸੂਲਿਆ ਜਾਵੇਗਾ, ਕਿਸ ‘ਚ ਡੇਟਾ ਦੀ ਲੋੜ ਹੋਵੇਗੀ ਅਤੇ ਅਮਰੀਕੀ ਸੀਮਾ ਸ਼ੁਲਕ ਅਤੇ ਸਰਹੱਦ ਸੁਰੱਖਿਆ ਨੂੰ ਡੇਟਾ ਕਿਵੇਂ ਭੇਜਿਆ ਜਾਵੇਗਾ।”
ਹੁਣ ਸਿਰਫ DHL ਐਕਸਪ੍ਰੈਸ ਹੀ ਇੱਕੋ-ਇੱਕ ਵਿਕਲਪ ਬਚਿਆ ਹੈ, ਜੋ ਅਜੇ ਵੀ ਕੰਮ ਕਰ ਰਿਹਾ ਹੈ, ਪਰ ਇਸ ਦੀ ਲਾਗਤ ਬਹੁਤ ਜ਼ਿਆਦਾ ਹੈ।
