ਵਜ਼ੀਰਾਬਾਦ: ਸੈਕਟਰ-57 ਵਿੱਚ ਇੱਕ ਅਜਿਹੀ ਘਟਨਾ ਵਾਪਰੀ ਜਿਸ ਨੇ ਸਾਰੇ ਸ਼ਹਿਰ ਨੂੰ ਸਦਮੇ ਵਿੱਚ ਪਾ ਦਿੱਤਾ। ਅੰਤਰਰਾਸ਼ਟਰੀ ਪੱਧਰ ਦੀ ਟੈਨਿਸ ਖਿਡਾਰਣ ਰਾਧਿਕਾ ਯਾਦਵ ਦਾ ਉਸ ਦੇ ਪਿਤਾ ਦੀਪਕ ਯਾਦਵ ਨੇ ਗੋਲੀ ਮਾਰ ਕੇ ਕਤਲ ਕਰ ਦਿੱਤਾ। ਇਹ ਮੰਦਭਾਗੀ ਘਟਨਾ ਸਵੇਰੇ 10:30 ਵਜੇ ਦੇ ਕਰੀਬ ਵਾਪਰੀ, ਜਦੋਂ ਰਾਧਿਕਾ ਆਪਣੇ ਘਰ ਦੀ ਪਹਿਲੀ ਮੰਜ਼ਿਲ ਦੀ ਰਸੋਈ ਵਿੱਚ ਕੰਮ ਕਰ ਰਹੀ ਸੀ। ਇਸ ਕਤਲ ਦਾ ਕਾਰਨ ਐਨਾ ਸਦਮੇ ਵਾਲਾ ਹੈ ਕਿ ਸੁਣਨ ਵਾਲੇ ਸਾਰੇ ਹੈਰਾਨ ਰਹਿ ਗਏ।
ਸੋਸ਼ਲ ਮੀਡੀਆ ਅਤੇ ਅਕੈਡਮੀ ਨਾਲ ਨਾਰਾਜ਼ਗੀ
ਰਾਧਿਕਾ ਯਾਦਵ ਇੱਕ ਟੈਨਿਸ ਅਕੈਡਮੀ ਦੀ ਸੰਚਾਲਕ ਸੀ ਅਤੇ ਸੋਸ਼ਲ ਮੀਡੀਆ ‘ਤੇ ਰੀਲਾਂ ਸਾਂਝੀਆਂ ਕਰਦੀ ਸੀ। ਇਹ ਗੱਲ ਉਸ ਦੇ ਪਿਤਾ ਦੀਪਕ ਨੂੰ ਬਹੁਤ ਪਰੇਸ਼ਾਨ ਕਰਦੀ ਸੀ। ਉਸ ਨੂੰ ਲੱਗਦਾ ਸੀ ਕਿ ਇਸ ਨਾਲ ਪਰਿਵਾਰ ਦੀ ਸਾਖ ਨੂੰ ਠੇਸ ਪਹੁੰਚ ਰਹੀ ਹੈ। ਐਫਆਈਆਰ ਅਨੁਸਾਰ, ਜਦੋਂ ਦੀਪਕ ਨੇ ਰਾਧਿਕਾ ਨੂੰ ਅਕੈਡਮੀ ਬੰਦ ਕਰਨ ਲਈ ਕਿਹਾ, ਤਾਂ ਉਸ ਨੇ ਮਨ੍ਹਾ ਕਰ ਦਿੱਤਾ। ਪਿੰਡ ਵਜ਼ੀਰਾਬਾਦ ਦੇ ਲੋਕਾਂ ਦੀਆਂ ਟਿੱਪਣੀਆਂ ਨੇ ਦੀਪਕ ਦੇ ਗੁੱਸੇ ਨੂੰ ਹੋਰ ਵਧਾ ਦਿੱਤਾ, ਜਿਸ ਕਾਰਨ ਉਹ ਮਾਨਸਿਕ ਤਣਾਅ ਵਿੱਚ ਰਹਿਣ ਲੱਗਾ।
ਕਤਲ ਦੀ ਵਜ੍ਹਾ ਕੀ ਸੀ?
ਪੁਲਿਸ ਵਿੱਚ ਦਰਜ ਐਫਆਈਆਰ ਮੁਤਾਬਕ, ਦੀਪਕ ਯਾਦਵ ਨੇ ਅਪਰਾਧ ਕਬੂਲ ਕਰ ਲਿਆ ਅਤੇ ਦੱਸਿਆ ਕਿ ਪਿੰਡ ਵਾਸੀ ਉਸ ਦੀ ਧੀ ਦੀ ਕਮਾਈ ਨੂੰ ਲੈ ਕੇ ਤਾਅਨੇ ਮਾਰਦੇ ਸਨ। ਰਾਧਿਕਾ ਇੱਕ ਸਫਲ ਟੈਨਿਸ ਖਿਡਾਰਣ ਸੀ, ਜਿਸ ਨੇ ਕਈ ਰਾਸ਼ਟਰੀ ਪੱਧਰ ਦੀਆਂ ਟਰਾਫੀਆਂ ਜਿੱਤੀਆਂ ਸਨ। ਮੋਢੇ ਦੀ ਸੱਟ ਕਾਰਨ ਉਸ ਨੇ ਖੇਡ ਛੱਡ ਦਿੱਤੀ ਅਤੇ ਟੈਨਿਸ ਅਕੈਡਮੀ ਸ਼ੁਰੂ ਕੀਤੀ। ਪਰ ਪਿੰਡ ਵਾਸੀਆਂ ਦੇ ਤਾਅਨੇ, “ਉਹ ਇੱਕ ਕੁੜੀ ਦੀ ਕਮਾਈ ‘ਤੇ ਜੀਉਂਦਾ ਹੈ,” ਦੀਪਕ ਨੂੰ ਮਾਨਸਿਕ ਤੌਰ ‘ਤੇ ਪਰੇਸ਼ਾਨ ਕਰ ਰਹੇ ਸਨ।
ਤਿੰਨ ਗੋਲੀਆਂ ਨਾਲ ਖਤਮ ਹੋਈ ਜ਼ਿੰਦਗੀ
ਪੁਲਿਸ ਅਨੁਸਾਰ, ਘਟਨਾ ਵਾਲੇ ਦਿਨ ਦੀਪਕ ਨੇ ਆਪਣੀ ਲਾਇਸੈਂਸੀ .32 ਬੋਰ ਰਿਵਾਲਵਰ ਨਾਲ ਰਾਧਿਕਾ ਦੀ ਪਿੱਠ ਵਿੱਚ ਤਿੰਨ ਗੋਲੀਆਂ ਮਾਰੀਆਂ। ਉਸ ਸਮੇਂ ਘਰ ਵਿੱਚ ਸਿਰਫ਼ ਦੀਪਕ, ਰਾਧਿਕਾ ਅਤੇ ਉਸ ਦੀ ਮਾਂ ਮੰਜੂ ਯਾਦਵ ਮੌਜੂਦ ਸਨ। ਮੰਜੂ ਨੂੰ ਬੁਖਾਰ ਸੀ, ਇਸ ਲਈ ਉਹ ਆਪਣੇ ਕਮਰੇ ਵਿੱਚ ਸੀ ਅਤੇ ਸਿਰਫ਼ ਗੋਲੀਆਂ ਦੀ ਆਵਾਜ਼ ਸੁਣੀ। ਗੋਲੀਆਂ ਦੀ ਆਵਾਜ਼ ਸੁਣ ਕੇ ਦੀਪਕ ਦਾ ਭਰਾ ਕੁਲਦੀਪ ਅਤੇ ਉਸ ਦਾ ਪੁੱਤਰ ਪਿਊਸ਼ ਮੌਕੇ ‘ਤੇ ਪਹੁੰਚੇ। ਉਨ੍ਹਾਂ ਨੇ ਰਾਧਿਕਾ ਨੂੰ ਖੂਨ ਨਾਲ ਲੱਥਪੱਥ ਵੇਖਿਆ ਅਤੇ ਉਸ ਨੂੰ ਸੈਕਟਰ-56 ਦੇ ਏਸ਼ੀਆ ਮਾਰੀਆਗੋ ਹਸਪਤਾਲ ਲੈ ਗਏ, ਜਿੱਥੇ ਉਸ ਨੂੰ ਮ੍ਰਿਤਕ ਐਲਾਨਿਆ ਗਿਆ।
ਪੁਲਿਸ ਜਾਂਚ ਅਤੇ ਸਬੂਤ
ਪੁਲਿਸ ਨੇ ਮੌਕੇ ਤੋਂ ਰਿਵਾਲਵਰ, ਖੂਨ ਦੇ ਨਮੂਨੇ ਅਤੇ ਰੌਂਦ ਜ਼ਬਤ ਕੀਤੇ। ਫਿੰਗਰਪ੍ਰਿੰਟ ਮਾਹਿਰਾਂ ਦੀ ਟੀਮ ਨੇ ਵੀ ਜਾਂਚ ਕੀਤੀ। ਸ਼ੁਰੂ ਵਿੱਚ, ਪਰਿਵਾਰ ਨੇ ਪੁਲਿਸ ਨੂੰ ਗੁੰਮਰਾਹ ਕਰਨ ਦੀ ਕੋਸ਼ਿਸ਼ ਕੀਤੀ ਅਤੇ ਕਿਹਾ ਕਿ ਰਾਧਿਕਾ ਨੇ ਖੁਦ ਨੂੰ ਗੋਲੀ ਮਾਰੀ। ਪਰ ਸਖ਼ਤ ਪੁੱਛਗਿੱਛ ਅਤੇ ਸਬੂਤਾਂ ਦੇ ਅਧਾਰ ‘ਤੇ ਦੀਪਕ ਨੇ ਅਪਰਾਧ ਕਬੂਲ ਕਰ ਲਿਆ। ਮੰਜੂ ਨੇ ਕੋਈ ਬਿਆਨ ਦੇਣ ਤੋਂ ਇਨਕਾਰ ਕਰ ਦਿੱਤਾ ਅਤੇ ਕਿਹਾ ਕਿ ਉਸ ਨੂੰ ਕੁਝ ਨਹੀਂ ਪਤਾ। ਪੁਲਿਸ ਨੇ ਦੀਪਕ ਵਿਰੁੱਧ ਕਤਲ ਦੀ ਧਾਰਾ 103(1) BNS ਅਤੇ ਅਸਲਾ ਐਕਟ, 54-1959 ਦੀ ਧਾਰਾ 27(3) ਅਧੀਨ ਮਾਮਲਾ ਦਰਜ ਕੀਤਾ ਹੈ।
