ਨਿਊਜ਼ ਡੈਸਕ: ਰੂਸ ਨੇ ਵੀਰਵਾਰ ਨੂੰ ਪੱਛਮੀ ਯੂਕਰੇਨ ਦੇ ਇੱਕ ਸ਼ਹਿਰ ‘ਤੇ ਕਰੂਜ਼ ਮਿਜ਼ਾਇਲਾਂ ਨਾਲ ਹਮਲਾ ਕਰ ਦਿੱਤਾ। ਇਸ ਹਮਲੇ ਵਿੱਚ ਇੱਕ ਇਮਾਰਤ ‘ਚ ਲਗਭਗ ਪੰਜ ਲੋਕਾਂ ਦੀ ਮੌਤ ਹੋ ਗਈ ਤੇ ਕਈ ਲੋਕ ਜ਼ਖਮੀ ਦੱਸੇ ਜਾ ਰਹੇ ਹਨ। ਮੀਡੀਆ ਰਿਪੋਰਟਾਂ ਮੁਤਾਬਕ ਅਧਿਕਾਰੀਆਂ ਨੇ ਕਿਹਾ ਕਿ ਪਿਛਲੇ ਸਾਲ ਕ੍ਰੇਮਲਿਨ ਦੀ ਫੌਜ ਵੱਲੋਂ ਦੇਸ਼ ‘ਤੇ ਹਮਲੇ ਤੋਂ ਬਾਅਦ ਲਵੀਵ ‘ਤੇ ਇਹ ਸਭ ਤੋਂ ਭਿਆਨਕ ਹਮਲਾ ਸੀ। ਰਾਤ ਦੇ ਹਮਲੇ ਵਿੱਚ ਇੱਕ ਰਿਹਾਇਸ਼ੀ ਇਮਾਰਤ ਨੂੰ ਭਾਰੀ ਨੁਕਸਾਨ ਪਹੁੰਚਿਆ ਹੈ।
ਲਵੀਵ ਦੇ ਗਵਰਨਰ ਮੈਕਸਿਮ ਕੋਜਿਤਸਕੀ ਨੇ ਦੱਸਿਆ ਕਿ ਮ੍ਰਿਤਕਾਂ ਵਿੱਚ ਇੱਕ 21 ਸਾਲਾ ਨੌਜਵਾਨ ਅਤੇ ਇੱਕ 95 ਸਾਲਾ ਔਰਤ ਵੀ ਸ਼ਾਮਲ ਹੈ। ਕੋਜਿਤਸਕੀ ਨੇ ਕਿਹਾ ਕਿ ਬਜ਼ੁਰਗ ਔਰਤ ਦੂਜੇ ਵਿਸ਼ਵ ਯੁੱਧ ਤੋਂ ਬਚ ਗਈ ਸੀ, ਪਰ ਉਹ ਯੂਕਰੇਨ-ਰੂਸ ਜੰਗ ਤੋਂ ਨਹੀਂ ਬਚ ਸਕੀ।
60 ਘਰਾਂ ਅਤੇ 50 ਕਾਰਾਂ ਨੂੰ ਵੀ ਪਹੁੰਚਿਆ ਨੁਕਸਾਨ
ਦੂਜੇ ਪਾਸੇ ਹਮਲੇ ਸਬੰਧੀ ਯੂਕਰੇਨ ਦੇ ਗ੍ਰਹਿ ਮੰਤਰਾਲੇ ਨੇ ਦੱਸਿਆ ਕਿ ਕੁਝ ਘੰਟਿਆਂ ਵਿੱਚ ਹੀ ਇਮਾਰਤ ਦੇ ਮਲਬੇ ‘ਚੋਂ ਆਖਰੀ ਪੀੜਤ ਨੂੰ ਵੀ ਬਾਹਰ ਕੱਢ ਲਿਆ ਗਿਆ ਅਤੇ ਉਸ ਹੇਠਾਂ ਦੱਬੇ ਸੱਤ ਲੋਕਾਂ ਨੂੰ ਜ਼ਿੰਦਾ ਬਚਾ ਲਿਆ ਗਿਆ। ਲਵੀਵ ਦੇ ਮੇਅਰ ਆਂਦਰੇ ਸਦੋਵਈ ਨੇ ਦੱਸਿਆ ਕਿ ਇਸ ਰੂਸੀ ਹਮਲੇ ‘ਚ ਲਗਭਗ 60 ਘਰਾਂ ਅਤੇ 50 ਕਾਰਾਂ ਨੂੰ ਵੀ ਨੁਕਸਾਨ ਪਹੁੰਚਿਆ ਹੈ। ਮੇਅਰ ਨੇ ਦੋ ਦਿਨਾਂ ਦੇ ਸਰਕਾਰੀ ਸੋਗ ਦਾ ਐਲਾਨ ਕੀਤਾ ਹੈ।
ਇਸ ਦੇ ਨਾਲ ਹੀ ਯੂਕਰੇਨ ਵਿੱਚ ਅਮਰੀਕੀ ਰਾਜਦੂਤ ਬ੍ਰਿਗੇਟ ਬ੍ਰਿੰਕ ਨੇ ਇਸ ਹਮਲੇ ਲਈ ਰੂਸ ਦੀ ਆਲੋਚਨਾ ਕੀਤੀ ਹੈ। ਉਨ੍ਹਾਂ ਟਵੀਟ ਕੀਤਾ ਕਿ ਰੂਸ ਵੱਲੋਂ ਯੂਕਰੇਨ ਦੇ ਨਾਗਰਿਕਾਂ ‘ਤੇ ਵਾਰ-ਵਾਰ ਕੀਤੇ ਜਾ ਰਹੇ ਹਮਲੇ ਬਹੁਤ ਡਰਾਉਣੇ ਹਨ।
Disclaimer: This article is provided for informational purposes only. The information should not be taken to represent the opinions, policy, or views of Global Punjab TV, nor any of its staff, employees, or affiliates.
