ਨਿਊਜ਼ ਡੈਸਕ: ਹੈਤੀ ਵਿੱਚ ਹਰੀਕੇਨ ਮੇਲਿਸਾ ਕਾਰਨ ਆਏ ਹੜ੍ਹਾਂ ਕਾਰਨ 25 ਲੋਕਾਂ ਦੀ ਮੌਤ ਹੋ ਗਈ ਹੈ। ਜਮੈਕਾ ਅਤੇ ਕਿਊਬਾ ਵਿੱਚ ਬੁੱਧਵਾਰ ਨੂੰ ਵੀ ਇਸ ਤੂਫਾਨ ਨੇ ਵਿਆਪਕ ਤਬਾਹੀ ਮਚਾਈ ਹੈ। ਦੱਖਣੀ ਹੈਤੀ ਦੇ ਤੱਟਵਰਤੀ ਸ਼ਹਿਰ ਪੇਟਿਟ-ਗੋਵੇ ਦੇ ਮੇਅਰ ਜੀਨ-ਬਰਟਰੈਂਡ ਸੁਬਰਾਮ ਨੇ ਐਸੋਸੀਏਟਿਡ ਪ੍ਰੈਸ ਨੂੰ ਦੱਸਿਆ ਕਿ ਲਾ ਡਿਗ ਨਦੀ ਦੇ ਬੰਨ੍ਹ ਟੁੱਟਣ ਅਤੇ ਨੇੜਲੇ ਘਰਾਂ ਵਿੱਚ ਹੜ੍ਹ ਆਉਣ ਕਾਰਨ 25 ਲੋਕ ਮਾਰੇ ਗਏ ਹਨ।
ਮੇਅਰ ਨੇ ਕਿਹਾ ਕਿ ਬੁੱਧਵਾਰ ਸਵੇਰ ਤੱਕ, ਕਈ ਘਰ ਢਹਿ ਗਏ ਸਨ ਅਤੇ ਲੋਕ ਅਜੇ ਵੀ ਮਲਬੇ ਹੇਠ ਫਸੇ ਹੋਏ ਸਨ। ਉਨ੍ਹਾਂ ਕਿਹਾ ਮੈਂ ਇਸ ਸਥਿਤੀ ਤੋਂ ਦੁਖੀ ਹਾਂ। ਪੀੜਤਾਂ ਨੂੰ ਬਚਾਉਣ ਲਈ ਸਰਕਾਰ ਨੂੰ ਮਦਦ ਦੀ ਅਪੀਲ ਕੀਤੀ ਹੈ।ਹਰੀਕੇਨ ਮੇਲਿਸਾ ਕਾਰਨ ਆਏ ਭਾਰੀ ਹੜ੍ਹ ਤੋਂ ਬਚਣ ਲਈ ਵਸਨੀਕ ਸੰਘਰਸ਼ ਕਰ ਰਹੇ ਹਨ। ਹੈਤੀ ਦੀ ਸਿਵਲ ਸੁਰੱਖਿਆ ਏਜੰਸੀ ਦਾ ਸਿਰਫ਼ ਇੱਕ ਅਧਿਕਾਰੀ ਪ੍ਰਭਾਵਿਤ ਖੇਤਰ ਵਿੱਚ ਮੌਜੂਦ ਹੈ।
ਜਮੈਕਾ ਵਿੱਚ ਘੱਟੋ-ਘੱਟ ਇੱਕ ਵਿਅਕਤੀ ਦੀ ਮੌਤ ਦੀ ਖ਼ਬਰ ਹੈ। ਜਿੱਥੇ ਤੂਫਾਨ 185 ਮੀਲ ਪ੍ਰਤੀ ਘੰਟਾ (295 ਕਿਲੋਮੀਟਰ ਪ੍ਰਤੀ ਘੰਟਾ) ਦੀ ਰਫ਼ਤਾਰ ਨਾਲ ਤੱਟ ਨਾਲ ਟਕਰਾਇਆ, ਜਿਸ ਨਾਲ ਇਹ ਹੁਣ ਤੱਕ ਦੇ ਸਭ ਤੋਂ ਸ਼ਕਤੀਸ਼ਾਲੀ ਅਟਲਾਂਟਿਕ ਤੂਫਾਨਾਂ ਵਿੱਚੋਂ ਇੱਕ ਬਣ ਗਿਆ ਹੈ। ਜਮੈਕਾ ਦੇ ਮੰਤਰੀ ਅਬਾਕਾ ਫਿਟਜ਼-ਹੈਨਲੇ ਨੇ ਸਥਾਨਿਕ ਰੇਡੀਓ ਸਟੇਸ਼ਨ ਨੇਸ਼ਨਵਾਈਡ ਨਿਊਜ਼ ਨੈੱਟਵਰਕ ਨੂੰ ਦੱਸਿਆ ਕਿ ਟਾਪੂ ਦੇਸ਼ ਦੇ ਪੱਛਮੀ ਖੇਤਰ ਵਿੱਚ ਇੱਕ ਬੱਚੇ ਉੱਤੇ ਇੱਕ ਦਰੱਖਤ ਡਿੱਗ ਪਿਆ। ਉਨ੍ਹਾਂ ਕਿਹਾ ਕਿ ਸਭ ਤੋਂ ਵੱਧ ਨੁਕਸਾਨ ਦੱਖਣ-ਪੱਛਮੀ ਅਤੇ ਉੱਤਰ-ਪੱਛਮੀ ਖੇਤਰਾਂ ਵਿੱਚ ਹੋਇਆ ਹੈ। ਅਧਿਕਾਰੀਆਂ ਨੇ ਦੱਸਿਆ ਕਿ ਕਈ ਘਰ ਢਹਿ ਗਏ ਹਨ ਅਤੇ ਸੜਕਾਂ ਬੰਦ ਹੋ ਗਈਆਂ ਹਨ।
ਅਧਿਕਾਰੀਆਂ ਨੇ ਕਿਹਾ ਕਿ ਪੂਰਬੀ ਕਿਊਬਾ ਵਿੱਚ ਲਗਭਗ 735,000 ਲੋਕ ਆਸਰਾ ਸਥਾਨਾਂ ਵਿੱਚ ਹਨ। ਮੇਲਿਸਾ ਦੇ ਕਿਊਬਾ ਨੂੰ ਪਾਰ ਕਰਦੇ ਸਮੇਂ ਕਮਜ਼ੋਰ ਹੋਣ ਦੀ ਭਵਿੱਖਬਾਣੀ ਕੀਤੀ ਗਈ ਹੈ, ਪਰ ਦੱਖਣ-ਪੂਰਬੀ ਜਾਂ ਕੇਂਦਰੀ ਬਹਾਮਾਸ ਤੋਂ ਲੰਘਦੇ ਸਮੇਂ ਮਜ਼ਬੂਤ ਬਣੇ ਰਹਿਣ ਦੀ ਸੰਭਾਵਨਾ ਹੈ।
