ਨਿਊਜ਼ ਡੈਸਕ: ਕੋਲੰਬੀਆ ਦੇ ਅਮੇਜ਼ਨ ਦੇ ਜੰਗਲਾਂ ‘ਚ ਜਹਾਜ਼ ਹਾਦਸੇ ਦੇ 40 ਦਿਨਾਂ ਬਾਅਦ 4 ਬੱਚਿਆਂ ਨੂੰ ਜ਼ਿੰਦਾ ਬਚਾਇਆ ਗਿਆ ਹੈ। ਇਹ ਬੱਚੇ ਸ਼ੁੱਕਰਵਾਰ ਨੂੰ ਕੋਲੰਬੀਆ ਦੇ ਕਾਕੇਟਾ ਅਤੇ ਗੁਆਵੀਏਰ ਸੂਬਿਆਂ ਦੀ ਸਰਹੱਦ ‘ਤੇ ਬਚਾਅ ਕਰਮੀਆਂ ਨੂੰ ਮਿਲੇ ਸਨ। ਇਹ ਸਾਰੇ ਬੱਚੇ ਭੈਣ-ਭਰਾ ਹਨ। ਇਨ੍ਹਾਂ ਦੀ ਉਮਰ 13, 9, 4 ਅਤੇ ਇੱਕ ਸਾਲ ਹੈ। ਬੱਚੇ ਹਿਊਟੋਟੋ ਭਾਈਚਾਰੇ ਨਾਲ ਸਬੰਧਤ ਦੱਸੇ ਜਾ ਰਹੇ ਹਨ। ਅਧਿਕਾਰੀਆਂ ਨੇ ਦਸਿਆ ਕਿ ਸਭ ਤੋਂ ਵੱਡੇ ਬੱਚੇ ਨੂੰ ਸੰਘਣੇ ਜੰਗਲ ’ਚ ਜ਼ਿੰਦਾ ਰਹਿਣ ਦੀ ਥੋੜ੍ਹੀ ਬਹੁਤ ਜਾਣਕਾਰੀ ਸੀ, ਜਿਸਦਾ ਉਨ੍ਹਾਂ ਨੇ ਪੂਰਾ ਲਾਹਾ ਲਿਆ। ਕੋਲੰਬੀਆ ਦੇ ਰਾਸ਼ਟਰਪਤੀ ਗੁਸਤਾਵੋ ਪੈਟਰੋ ਨੇ ਇਸ ਨੂੰ ਪੂਰੇ ਦੇਸ਼ ਲਈ ਖੁਸ਼ੀ ਦਾ ਦਿਨ ਦੱਸਿਆ ਹੈ।
ਦਸ ਦਈਏ ਕਿ ਬੱਚਿਆਂ ਦੀ ਮਾਂ ਅਤੇ ਦੋ ਪਾਇਲਟਾਂ ਦੀ ਮੌਤ ਹੋ ਗਈ ਸੀ ਜਦੋਂ ਉਨ੍ਹਾਂ ਦਾ ਛੋਟਾ ਜਹਾਜ਼ 1 ਮਈ ਨੂੰ ਜੰਗਲ ਵਿੱਚ ਹਾਦਸਾਗ੍ਰਸਤ ਹੋ ਗਿਆ ਸੀ। ਇਹ ਇੱਕ ਨਿੱਜੀ ਜਹਾਜ਼ ਸੀ ਅਤੇ ਇਸ ਵਿੱਚ ਬੱਚਿਆਂ ਸਮੇਤ 7 ਲੋਕ ਸਵਾਰ ਸਨ। ਹਾਦਸੇ ਦੇ ਦੋ ਹਫਤੇ ਬਾਅਦ 16 ਮਈ ਨੂੰ ਜੰਗਲ ’ਚ ਮਲਬਾ ਮਿਲਿਆ। ਇਸ ਵਿਚ ਤਿੰਨ ਲੋਕਾਂ ਦੀਆਂ ਲਾਸ਼ਾਂ ਮਿਲੀਆਂ ਪਰ ਚਾਰੇ ਬੱਚੇ ਲੇਸਲੀ ਮੁਕੁਟੁਯ (9), ਟੀਐੱਨ ਰਾਨੋਕ ਮੁਕੁਟੁਯ (4) ਤੇ ਕ੍ਰਿਸਟਿਨ ਰਾਨੋਕ ਮੁਕੁਟੁਯ (11 ਮਹੀਨੇ) ਗਾਇਬ ਸਨ। 150 ਫੌਜੀਆਂ ਨੇ ਖੋਜੀ ਕੁੱਤਿਆਂ ਨਾਲ ਜੰਗਲ ’ਚ ਉਨ੍ਹ੍ਰਾਂ ਦੀ ਭਾਲ ਸ਼ੁਰੂ ਕੀਤੀ। ਸਥਾਨਕ ਆਦੀਵਾਸੀਆਂ ਦੀ ਵੀ ਮਦਦ ਲਈ ਗਈ। ਮੁਹਿੰਮ ਘਟਨਾ ਸਥਾਨ ਦੇ ਕਰੀਬ ਸਾਢੇ ਚਾਰ ਕਿਲੋਮੀਟਰ ਦੇ ਘੇਰੇ ’ਚ ਚਲਾਈ ਗਈ।ਜਾਂਚ ਦੌਰਾਨ ਰਸਤੇ ’ਚ ਦੁੱਧ ਦੀ ਬੋਤਲ, ਡਾਈਪਰ, ਬੱਚਿਆਂ ਵੱਲੋਂ ਖਾਧੇ ਗਏ ਫਲ, ਟਹਿਣੀਆਂ ਤੇ ਪੱਤਿਆਂ ਦੀ ਮਦਦ ਨਾਲ ਬਣਾਇਆ ਗਿਆ ਰੈਣਬਸੇਰਾ ਮਿਲਣ ’ਤੇ ਉਨ੍ਹਾਂ ਦੇ ਬਚਣ ਦੀ ਉਮੀਦ ਵੱਧ ਗਈ। ਇਸ ਤੋਂ ਬਾਅਦ ਫੌਜ ਵੱਲੋਂ ਉਨ੍ਹਾਂ ਇਲਾਕਿਆਂ ’ਚ ਖਾਣ-ਪੀਣ ਦਾ ਸਾਮਾਨ ਵੀ ਸੁੱਟਿਆ ਗਿਆ, ਜਿਸ ਨਾਲ ਬੱਚਿਆਂ ਨੂੰ ਮਦਦ ਮਿਲ ਸਕੇ।
ਸਾਰੇ ਚਾਰ ਬੱਚੇ ਹੁਣ ਡਾਕਟਰੀ ਦੇਖਭਾਲ ਅਧੀਨ ਹਨ ਅਤੇ ਘੱਟੋ-ਘੱਟ ਦੋ ਹਫ਼ਤਿਆਂ ਤੱਕ ਹਸਪਤਾਲ ਵਿੱਚ ਰਹਿ ਸਕਦੇ ਹਨ। ਬੱਚਿਆਂ ਦੇ ਮਿਲਣ ਤੋਂ ਬਾਅਦ ਲੋਕ ਜਿੰਨੇ ਖੁਸ਼ ਹਨ, ਓਨੇ ਹੀ ਇੱਕ ਸਵਾਲ ਵਾਰ-ਵਾਰ ਪੁੱਛਿਆ ਜਾ ਰਿਹਾ ਹੈ ਕਿ ਬੱਚਿਆਂ ਨੇ ਇੰਨਾ ਸਮਾਂ ਆਪਣੇ ਆਪ ਨੂੰ ਕਿਵੇਂ ਜ਼ਿੰਦਾ ਰੱਖਿਆ। ਰਿਪੋਰਟਾਂ ਮੁਤਾਬਕ ਬੱਚਿਆਂ ਦੇ ਚਾਚਾ ਫਿਡੇਨਸੀਓ ਵਲੇਂਸੀਆ ਨੇ ਬੱਚਿਆਂ ਦੇ 40 ਦਿਨਾਂ ਤੱਕ ਜ਼ਿੰਦਾ ਰਹਿਣ ਦਾ ਕਾਰਨ ਕਸਾਵਾ ਦਾ ਆਟਾ ਅਤੇ ਜੰਗਲ ਦੇ ਕੁਝ ਜਾਣੇ-ਪਛਾਣੇ ਫਲ ਦਸੇ ਹਨ।
Disclaimer: This article is provided for informational purposes only. The information should not be taken to represent the opinions, policy, or views of Global Punjab TV, nor any of its staff, employees, or affiliates.
