ਸੰਗਰੂਰ: ਸ਼੍ਰੋਮਣੀ ਅਕਾਲੀ ਦਲ ਡੈਮੋਕਰੇਟਿਕ ਦੇ ਪ੍ਰਧਾਨ ਤੇ ਰਾਜ ਸਭਾ ਮੈਂਬਰ ਸੁਖਦੇਵ ਸਿੰਘ ਢੀਂਡਸਾ ਨੇ ਪੰਜਾਬ ਦੀ ਕਿਸਾਨੀ ਤੇ ਜਵਾਨੀ ਨੂੰ ਬਚਾਉਣ ਵਾਸਤੇ ਸਾਰੀਆਂ ਸੁਹਿਰਦ ਧਿਰਾਂ ਨੂੰ ਇੱਕਜੁੱਟ ਹੋਕੇ ਸੰਘਰਸ਼ ਸ਼ੁਰੂ ਕਰਨ ਦਾ ਸੱਦਾ ਦਿੱਤਾ ਹੈ। ਇਸ ਵੇਲੇ ਪੰਜਾਬ ਬਹੁਤ ਹੀ ਨਾਜ਼ੁਕ ਦੌਰ ਵਿੱਚੋਂ ਗੁਜ਼ਰ ਰਿਹਾ ਹੈ ਜੇਕਰ ਹੁਣ ਵੀ ਨਾ ਸੰਭਲੇ ਤਾਂ ਆਉਣ ਵਾਲੀਆਂ ਪੀੜੀਆਂ ਸਾਨੂੰ ਕਦੇ ਮੁਆਫ ਨਹੀਂ ਕਰਨਗੀਆਂ। ਉਹਨਾਂ ਕਿਹਾ ਕਿ ਦੇਸ਼ ਇਸ ਮੁਕਾਮ ਤਕ ਲੈ ਕੇ ਆਉਣ ਵਿੱਚ ਕਿਸਾਨਾਂ ਦਾ ਬਹੁਤ ਵੱਡਾ ਯੋਗਦਾਨ ਹੈ।
ਕਿਸਾਨਾਂ ਨਾਲ ਜੋ ਹੋ ਰਿਹਾ ਹੈ ਇਸ ਨਾਲ ਦੁਨੀਆ ਪੱਧਰ ਤੇ ਨਿੰਦਾ ਹੋਵੇਗੀ। ਉਹਨਾਂ ਕਿਹਾ ਜੂਝ ਰਹੇ ਕਿਸਾਨਾਂ ਤੇ ਨੌਜਵਾਨਾਂ ਨੂੰ ਇਹ ਪਛਾਣ ਕਰਨ ਦੀ ਲੋੜ ਹੈ ਕਿ ਉਪਰੋਂ ਦਿਖਾਵਾ ਕੌਣ ਕਰਦਾ ਹੈ ਤੇ ਹਕੀਕਤਾਂ ਨਾਲ ਕੌਣ ਖੜਾ ਹੈ। ਇਥੇ ਬਿਆਨ ਜਾਰੀ ਕਰਦਿਆਂ ਢੀਂਡਸਾ ਨੇ ਕਿਹਾ ਕਿ ਕੈਪਟਨ ਅਮਰਿੰਦਰ ਸਿੰਘ ਤੇ ਸੁਖਬੀਰ ਸਿੰਘ ਬਾਦਲ ਕਿਸਾਨਾਂ ਤੇ ਨੌਜਵਾਨਾਂ ਦੇ ਗੰਭੀਰ ਮਸਲਿਆਂ ਉਪਰ ਪਿਛਲੇ ਸਮੇਂ ਤੋਂ ਇੱਕ ਦੂਜੇ ਨੀਵਾਂ ਦਿਖਾਉਣ ਦੀ ਕੋਝੀ ਸਿਆਸਤ ਕਰਦੇ ਰਹੇ ਜਿਸ ਕਾਰਨ ਇਹ ਮਸਲੇ ਹੋਰ ਪੇਚੀਦਾ ਹੁੰਦੇ ਗਏ। ਇਸ ਕਰਕੇ ਇਹਨਾਂ ਦਾ ਲੋਕ ਹੱਕਾਂ ਲਈ ਧੇਲੇ ਦਾ ਯੋਗਦਾਨ ਨਹੀਂ ਹੈ।
ਉਹਨਾਂ ਕਿਹਾ ਕਿ ਇੱਕ ਪੰਜਾਬ ਦਾ ਮੁੱਖ ਮੰਤਰੀ ਹੈ ਤੇ ਦੂਸਰੀ ਧਿਰ ਕੇਂਦਰ ਦੀ ਕੈਬਨਿਟ ਮੰਤਰੀ ਹੈ। ਉੱਚੀਆਂ ਪੱਦਵੀਆਂ ਉੱਤੇ ਬੈਠ ਕੇ ਵੀ ਇਹ ਨਹੀਂ ਜਾਣ ਸਕੇ ਕਿ ਪੰਜਾਬ ਤੇ ਕਿਸਾਨਾਂ ਉਪਰ ਵੱਡਾ ਖਤਰਨਾਕ ਆਰਥਿਕ ਹਮਲਾ ਕਰਨ ਲਈ ਬਕਾਇਦਾ ਖਰੜਾ ਤਿਆਰ ਕੀਤਾ ਜਾ ਰਿਹਾ ਹੈ ਇਹ ਮੀਟਿੰਗ ਵਿੱਚ ਸ਼ਾਮਲ ਹੋ ਕੇ ਸਹਿਮਤੀ ਵੀ ਦਿੰਦੇ ਰਹੇ। ਫਿਰ ਇਹਨਾਂ ਦੀ ਜਿੰਮੇਵਾਰੀ ਕਿਥੇ ਹੈ ਤੇ ਕਾਬਲੀਅਤ ਕਿਥੇ ਹੈ।
ਢੀਂਡਸਾ ਨੇ ਦੋਸ਼ ਲਾਇਆ ਕਿ ਪੰਜਾਬ ਦੇ ਇਹ ਨੁਮਾਇੰਦੇ ਕਾਰਪੋਰੇਟ ਘਰਾਣਿਆਂ ਨਾਲ ਮਿਲੇ ਹੋਏ ਹਨ। ਜੇਕਰ ਸਮੇਂ ਸਿਰ ਖੇਤੀ ਆਰਡੀਨੈੱਸਾਂ ਬਾਰੇ ਕਿਸਾਨਾਂ ਤੇ ਫੈਡਰਲ ਢਾਂਚੇ ਪੱਖੀ ਧਿਰਾਂ ਨਾਲ ਕੇਂਦਰ ਵਿੱਚ ਬਣ ਰਹੀਆਂ ਲੋਕ ਵਿਰੋਧੀ ਨੀਤੀਆਂ ਸਾਂਝੀਆਂ ਕਰਦੇ ਤਾਂ ਸ਼ਾਇਦ ਹਾਲਾਤ ਹੋਰ ਹੁੰਦੇ। ਢੀਂਡਸਾ ਨੇ ਕਿਹਾ ਕਿ ਪੰਜਾਬ ਦੀ ਜ਼ਰਖੇਜ ਧਰਤੀ ਤੋਂ ਬੇਇਨਸਾਫੀ ਤੇ ਖੇਤੀ ਵਿਰੋਧੀ ਆਰਡੀਨੈੱਸਾਂ ਖਿਲਾਫ਼ ਉੱਠੇ ਜਬਰਦਸਤ ਕਿਸਾਨ ਅੰਦੋਲਨ ਨੇ ਸੁਖਬੀਰ ਬਾਦਲ ਦੀ ਕੁਫਰ ਤੋਲਣ, ਪੰਜਾਬ ਵਿਰੋਧੀ ਤੇ ਝੂਠੀ ਸਿਆਸਤ ਨੂੰ ਮੂਧੇ ਮੂੰਹ ਸੁੱਟ ਦਿੱਤਾ।
ਉਹਨਾਂ ਦੋਸ਼ ਲਾਇਆ ਕਿ ਪਹਿਲਾਂ ਹਰਸਿਮਰਤ ਕੌਰ ਬਾਦਲ ਤੇ ਫਿਰ ਸੁਖਬੀਰ ਬਾਦਲ ਨੇ ਖੇਤੀ ਵਿਰੋਧੀ ਆਰਡੀਨੈੱਸਾਂ ਦੇ ਹੱਕ ਵਿੱਚ ਧੂੰਆਂ ਧਾਰ ਪ੍ਰਚਾਰ ਕਰਕੇ ਕਿਸਾਨਾਂ ਦੀ ਆਵਾਜ਼ ਨੂੰ ਦਬਾਕੇ ਅੰਦੋਲਨ ਫੇਲ ਕਰਨ ਦਾ ਯਤਨ ਕੀਤਾ ਤੇ ਫਿਰ ਪ੍ਰਕਾਸ ਸਿੰਘ ਬਾਦਲ ਜਰੀਏ ਕਿਸਾਨ ਵਿਰੋਧੀ ਲੋਕਾਂ ਨੂੰ ਹੌਸਲਾ ਦੇਣ ਦਾ ਯਤਨ ਕੀਤਾ। ਜਦੋਂ ਕੋਈ ਵਾਹ ਨਾ ਚੱਲੀ ਤਾਂ ਖੇਤੀ ਮੰਤਰੀ ਦੀ “ਗਿੱਦੜ ਚਿੱਠੀ“ ਨੂੰ ਢਾਲ ਬਣਾਕੇ ਕਿਸਾਨਾਂ ਨੂੰ ਦੋਫਾੜ ਕਰਕੇ ਅੰਦੋਲਨ ਕਮਜ਼ੋਰ ਕਰਨ ਦਾ ਕੋਝਾ ਯਤਨ ਕੀਤਾ।
ਢੀਂਡਸਾ ਨੇ ਕਿਹਾ ਕਿ ਜਦੋਂ ਕਿਸਾਨਾਂ ਦੋ ਰੋਹ ਹੋਰ ਪ੍ਰਚੰਡ ਹੋਣ ਦੇ ਦਬਾਅ ਹੇਠ ਪੈਰਾਂ ਹੇਠੋਂ ਸਿਆਸੀ ਜ਼ਮੀਨ ਖਿਸਕਣ ਲੱਗੀ ।ਫਿਰ ਇਸ ਖਿਸਕਦੀ ਸਿਆਸੀ ਜਮੀਨ ਨੂੰ ਬਚਾਉਣ ਦੇ ਨਾਪਾਕ ਇਰਾਦੇ ਨਾਲ ਅਸਤੀਫਾ ਦੇ ਦਿੱਤਾ। ਸਿਤਮ ਦੀ ਗੱਲ ਤਾਂ ਇਹ ਹੈ ਕਿ ਬਾਦਲ ਪਰਿਵਾਰ ਚੀਚੀ ਨੂੰ ਖੂਨ ਲਾਕੇ ਕੁਰਬਾਨੀ ਦੇਣ ਦੀ ਗੱਲ ਕਰਦੇ ਹਨ ਇਹਨਾਂ ਪਤਾ ਹੀ ਨਹੀਂ ਕੁਰਬਾਨੀ ਦੀ ਕੀ ਪਰਿਭਾਸ਼ਾ ਹੁੰਦੀ ਹੈ । ਹਕੀਕਤ ਇਹ ਵੀ ਕਿ ਜਦੋਂ ਅਸਤੀਫਾ ਦਿੱਤਾ । ਉਸ ਵਕਤ ਬਿਲ ਪਾਸ ਹੋ ਗਿਆ ਸੀ । ਮੇਰਾ ਇਹ ਸਭ ਕਹਿਣ ਦਾ ਭਾਵ ਰਾਜਨੀਤੀ ਤੋਂ ਨਹੀਂ ਸਗੋਂ ਲੋਕਾਂ ਨੂੰ ਖਰੇ ਖੋਟੇ ਤੇ ਕੁਰਸੀਆਂ ਦੇ ਲਾਲਚ ਵਿੱਚ ਰੰਗ ਬਦਲਦੇ ਦੇ ਆਗੂਆਂ ਦੇ ਕਿਰਦਾਰ ਬਾਰੇ ਜਾਣੂ ਕਰਵਾਉਣਾ ਹੈ ਤਾਂ ਲੋਕ ਮੁੜ ਅਜਿਹੇ ਰੰਗ ਬਦਲਦੇ ਆਗੂਆਂ ਤੋਂ ਗੁੰਮਰਾਹ ਨਾ ਹੋਣ। ਢੀਂਡਸਾ ਨੇ ਕਿਹਾ ਕਿ ਸ਼੍ਰੋਮਣੀ ਅਕਾਲੀ ਦਲ ਡੈਮੋਕਰੇਟਿਕ ਕਿਸਾਨੀ ਤੇ ਜਵਾਨੀ ਨੂੰ ਬਚਾਉਣ ਦੇ ਹਰ ਸੰਘਰਸ਼ ਲਈ ਹਰ ਜਥੇਬੰਦੀ ਨਾਲ ਗੱਲਬਾਤ ਕਰਨ ਦਾ ਇਛੁੱਕ ਹੈ ਜੋ ਰਾਜਸੀ ਵਖਰੇਵਿਆਂ ਤੋਂ ਉਪਰ ਉੱਠਕੇ ਪੂਰੀ ਸੁਹਿਰਦਤਾ ਨਾਲ ਸੰਘਰਸ਼ ਵਿੱਚ ਆਵੇਗੀ । ਉਹਨਾਂ ਪੰਜਾਬ ਦੀਆਂ ਸਮੂਹ ਜਥੇਬੰਦੀਆਂ ਨੂੰ ਪੂਰੀ ਏਕਤਾ ਨਾਲ ਅੱਗੇ ਆਕੇ ਇਸ ਸੰਕਟ ਦੀ ਘੜੀ ਕਿਸਾਨਾਂ ਨਾਲ ਹਿੱਕ ਡਾਹਕੇ ਖੜਣ ਦੀ ਅਪੀਲ ਵੀ ਕੀਤੀ ।
