ਵਾਸ਼ਿੰਗਟਨ: ਰੂਸ ਨੂੰ ਸਖ਼ਤ ਟੱਕਰ ਦੇਣ ਤੋਂ ਬਾਅਦ ਹੁਣ ਅਮਰੀਕਾ ਦੀ ਅਗਵਾਈ ਵਾਲੇ ਯੂਰਪੀ ਫ਼ੌਜੀ ਸੰਗਠਨ ਨਾਟੋ ਨੇ ਚੀਨ ‘ਤੇ ਸ਼ਿਕੰਜਾ ਕੱਸਣਾ ਸ਼ੁਰੂ ਕਰ ਦਿੱਤਾ ਹੈ। ਚੀਨ ਅਤੇ ਰੂਸ ਤੋਂ ਖਤਰੇ ਦਾ ਸਾਹਮਣਾ ਕਰ ਰਹੇ ਏਸ਼ੀਆ ‘ਚ ਜਾਪਾਨ ਦੇ ਅੰਦਰ ਨਾਟੋ ਦੇਸ਼ ਆਪਣਾ ਦਫਤਰ ਖੋਲ੍ਹਣ ਜਾ ਰਹੇ ਹਨ। ਇੰਨਾ ਹੀ ਨਹੀਂ ਚੀਨੀ ਡ੍ਰੈਗਨ ‘ਤੇ ਸ਼ਿਕੰਜਾ ਕੱਸਣ ਲਈ ਅਮਰੀਕਾ ਨੇ ‘ਨਾਟੋ ਪਲੱਸ’ ਬਣਾਇਆ ਹੈ। ਅਮਰੀਕਾ ਹੁਣ ਭਾਰਤ ਨੂੰ ਨਾਟੋ ਪਲੱਸ ਦੇਸ਼ਾਂ ਦਾ ਹਿੱਸਾ ਬਣਾਉਣਾ ਚਾਹੁੰਦਾ ਹੈ।
ਦੱਸ ਦੇਈਏ ਕਿ ਨਾਟੋ ਪਲੱਸ ਇੱਕ ਸੁਰੱਖਿਆ ਵਿਵਸਥਾ ਹੈ ਜੋ ਗਲੋਬਲ ਰੱਖਿਆ ਸਹਿਯੋਗ ਵਧਾਉਣ ਲਈ ਨਾਟੋ ਅਤੇ 5 ਗਠਜੋੜ ਦੇਸ਼ਾਂ ਨਿਊਜ਼ੀਲੈਂਡ, ਆਸਟ੍ਰੇਲੀਆ, ਇਜ਼ਰਾਈਲ, ਜਾਪਾਨ ਅਤੇ ਦੱਖਣੀ ਕੋਰੀਆ ਨੂੰ ਇਕੱਠਾ ਕਰਦਾ ਹੈ। ਜਾਣੋ ਕਿ ਜੇਕਰ ਭਾਰਤ ਨਾਟੋ ਪਲੱਸ ‘ਚ ਸ਼ਾਮਿਲ ਹੋਵੇਗਾ ਤਾਂ ਇਨ੍ਹਾਂ ਦੇਸ਼ਾਂ ਵਿਚਾਲੇ ਖੁਫੀਆ ਜਾਣਕਾਰੀ ਬਿਨਾਂ ਕਿਸੇ ਰੁਕਾਵਟ ਦੇ ਸਾਂਝੀ ਕੀਤੀ ਜਾ ਸਕੇਗੀ। ਇਸ ਤੋਂ ਇਲਾਵਾ ਭਾਰਤ ਬਿਨਾਂ ਕਿਸੇ ਸਮੇਂ ਦੇ ਅੰਤਰਾਲ ਦੇ ਆਧੁਨਿਕ ਫੌਜੀ ਤਕਨੀਕ ਤੱਕ ਪਹੁੰਚ ਕਰ ਸਕੇਗਾ। ਅਮਰੀਕਾ ਅਤੇ ਚੀਨੀ ਕਮਿਊਨਿਸਟ ਪਾਰਟੀ (ਸੀਸੀਪੀ) ਦਰਮਿਆਨ ਰਣਨੀਤਕ ਮੁਕਾਬਲੇ ਬਾਰੇ ਹਾਊਸ ਸਿਲੈਕਟ ਕਮੇਟੀ ਨੇ ਭਾਰਤ ਨੂੰ ਸ਼ਾਮਿਲ ਕਰਕੇ ਨਾਟੋ ਪਲੱਸ ਨੂੰ ਮਜ਼ਬੂਤ ਕਰਨ ਸਮੇਤ ਤਾਈਵਾਨ ਦੀ ਪ੍ਰਤੀਰੋਧ ਸਮਰੱਥਾ ਵਧਾਉਣ ਲਈ ਨੀਤੀਗਤ ਪ੍ਰਸਤਾਵ ਪਾਸ ਕੀਤਾ ਹੈ।ਪ੍ਰਧਾਨ ਮੰਤਰੀ ਮੋਦੀ ਦੇ ਅਮਰੀਕਾ ਦੌਰੇ ਤੋਂ ਪਹਿਲਾਂ ਇਹ ਅਮਰੀਕਾ ਦਾ ਵੱਡਾ ਪ੍ਰਸਤਾਵ ਮੰਨਿਆ ਜਾ ਰਿਹਾ ਹੈ। ਨਾਟੋ ਪਲੱਸ ਦਾ ਮੈਂਬਰ ਬਣਨ ਨਾਲ ਭਾਰਤ ਕੋਲ ਬਿਨਾਂ ਕਿਸੇ ਦੇਰੀ ਦੇ ਅਤਿ ਆਧੁਨਿਕ ਫੌਜੀ ਤਕਨਾਲੋਜੀ ਤੱਕ ਪਹੁੰਚ ਹੋਵੇਗੀ।
ਦਸਣਯੋਗ ਹੈ ਕਿ ਇਸ ਕਮੇਟੀ ਦੀ ਅਗਵਾਈ ਚੀਫ ਮਾਈਕ ਗਾਲਾਘਰ ਅਤੇ ਰੈਂਕਿੰਗ ਮੈਂਬਰ ਰਾਜਾ ਕ੍ਰਿਸ਼ਨਾਮੂਰਤੀ ਕਰ ਰਹੇ ਸਨ। ਚੋਣ ਕਮੇਟੀ ਨੇ ਕਿਹਾ ਕਿ ਚੀਨ ਦੀ ਕਮਿਊਨਿਸਟ ਪਾਰਟੀ ਨਾਲ ਰਣਨੀਤਕ ਮੁਕਾਬਲਾ ਜਿੱਤਣ ਅਤੇ ਤਾਈਵਾਨ ਦੀ ਸੁਰੱਖਿਆ ਯਕੀਨੀ ਬਣਾਉਣ ਲਈ ਅਮਰੀਕਾ ਨੂੰ ਭਾਰਤ ਸਮੇਤ ਆਪਣੇ ਸਹਿਯੋਗੀਆਂ ਅਤੇ ਸੁਰੱਖਿਆ ਭਾਈਵਾਲਾਂ ਨਾਲ ਸਬੰਧ ਮਜ਼ਬੂਤ ਕਰਨ ਦੀ ਲੋੜ ਹੈ।
Disclaimer: This article is provided for informational purposes only. The information should not be taken to represent the opinions, policy, or views of Global Punjab TV, nor any of its staff, employees, or affiliates.
