ਅਹਿਮਦਾਬਾਦ: ਗੁਜਰਾਤ ’ਚ ਅੱਜ ਇੱਕ ਭਿਆਨਕ ਜਹਾਜ਼ ਹਾਦਸਾ ਵਾਪਰਿਆ। ਏਅਰ ਇੰਡੀਆ ਦੀ ਫਲਾਈਟ AI171, ਇੱਕ ਬੋਇੰਗ 787-8 ਡ੍ਰੀਮਲਾਈਨਰ, ਜੋ ਅਹਿਮਦਾਬਾਦ ਤੋਂ ਲੰਦਨ (ਗੈਟਵਿਕ) ਜਾ ਰਹੀ ਸੀ, ਟੇਕ-ਆਫ ਦੇ 5 ਮਿੰਟ ਮਗਰੋਂ ਮੇਘਾਨੀ ਨਗਰ ਦੇ ਰਿਹਾਇਸ਼ੀ ਇਲਾਕੇ ’ਚ ਕਰੈਸ਼ ਹੋ ਗਈ। ਇਹ ਜਹਾਜ਼ BJ ਮੈਡੀਕਲ ਕਾਲਜ ਦੇ ਹੋਸਟਲ ਦੀ ਇਮਾਰਤ ’ਤੇ ਡਿੱਗਿਆ, ਜਿੱਥੇ ਵਿਦਿਆਰਥੀ ਦੁਪਹਿਰ ਦਾ ਖਾਣਾ ਖਾਣ ਲਈ ਕੈਂਟੀਨ ’ਚ ਮੌਜੂਦ ਸਨ। ਖਦਸ਼ਾ ਹੈ ਕਿ ਲਗਭਗ 20 ਵਿਦਿਆਰਥੀਆਂ ਦੀ ਮੌਤ ਹੋ ਗਈ ਹੈ, ਹਾਲਾਂਕਿ ਅਧਿਕਾਰਤ ਪੁਸ਼ਟੀ ਨਹੀਂ ਹੋਈ।
ਹਾਦਸੇ ਦੀਆਂ ਤਸਵੀਰਾਂ ਅਤੇ ਵੇਰਵੇ
ਜਹਾਜ਼ ਦਾ ਪਿਛਲਾ ਹਿੱਸਾ ਹੋਸਟਲ ਦੀ ਇਮਾਰਤ ਨਾਲ ਲਟਕਿਆ ਹੋਇਆ ਨਜ਼ਰ ਆ ਰਿਹਾ ਹੈ, ਜਦਕਿ ਅਗਲਾ ਹਿੱਸਾ ਪੂਰੀ ਤਰ੍ਹਾਂ ਸੜ ਕੇ ਸੁਆਹ ਹੋ ਗਿਆ।
ਜਹਾਜ਼ ਨੇ 1:39 PM IST ’ਤੇ ਰਨਵੇ 23 ਤੋਂ ਟੇਕ-ਆਫ ਕੀਤਾ, ਪਰ ਇੱਕ ਦਰਖਤ ਨਾਲ ਟਕਰਾਉਣ ਮਗਰੋਂ ਡਿੱਗਿਆ। ਪਾਇਲਟ ਨੇ ATC ਨੂੰ “ਮੇਡੇ” ਕਾਲ ਕੀਤੀ, ਪਰ ਸੰਪਰਕ ਟੁੱਟ ਗਿਆ। ਵੱਡੇ ਵਿਸਫੋਟ ਮਗਰੋਂ ਜਹਾਜ਼ ਅੱਗ ਦੀਆਂ ਲਪਟਾਂ ’ਚ ਬਦਲ ਗਿਆ।
ਜਹਾਜ਼ ’ਚ 242 ਵਿਅਕਤੀ ਸਵਾਰ ਸਨ (230 ਯਾਤਰੀ, 2 ਪਾਇਲਟ, 10 ਕਰੂ ਮੈਂਬਰ)।
ਬਚਾਅ ਅਤੇ ਸਰਕਾਰੀ ਕਾਰਵਾਈ
NDRF ਦੀਆਂ 3 ਟੀਮਾਂ (90 ਜਵਾਨ) ਅਤੇ 3 ਫਾਇਰ ਬ੍ਰਿਗੇਡ ਟੀਮਾਂ ਮੌਕੇ ’ਤੇ ਹਨ। ਵਡੋਦਰਾ ਤੋਂ 2 ਹੋਰ NDRF ਟੀਮਾਂ ਅਹਿਮਦਾਬਾਦ ਰਵਾਨਾ ਹੋਈਆਂ। 5 ਵੱਡੀਆਂ ਐਂਬੂਲੈਂਸਾਂ ਜ਼ਖਮੀਆਂ ਨੂੰ ਸਿਵਿਲ ਹਸਪਤਾਲ ਦੇ ਟਰੌਮਾ ਸੈਂਟਰ ’ਚ ਲੈ ਜਾ ਰਹੀਆਂ ਹਨ, ਜਿਸ ਲਈ ਗ੍ਰੀਨ ਕਾਰੀਡੋਰ ਬਣਾਇਆ ਗਿਆ।
ਅਹਿਮਦਾਬਾਦ ਦੇ ਨਗਰ ਕਮਿਸ਼ਨਰ ਅਤੇ ਪੁਲਿਸ ਕਮਿਸ਼ਨਰ ਮੌਕੇ ’ਤੇ ਮੌਜੂਦ ਹਨ। ਸੜਕਾਂ ਬੰਦ ਕਰ ਦਿੱਤੀਆਂ ਗਈਆਂ।
ਅਹਿਮਦਾਬਾਦ ਦੇ ਸਾਰੇ ਹਸਪਤਾਲਾਂ ਨੂੰ ਅਲਰਟ ’ਤੇ ਰੱਖਿਆ ਗਿਆ। ਜ਼ਖਮੀ ਸਥਾਨਕ ਵਸਨੀਕਾਂ ਨੂੰ ਸਿਵਿਲ ਹਸਪਤਾਲ ’ਚ ਭਰਤੀ ਕੀਤਾ ਜਾ ਰਿਹਾ ਹੈ, ਪਰ ਜਹਾਜ਼ ਦੇ ਯਾਤਰੀਆਂ ਬਾਰੇ ਅਜੇ ਕੋਈ ਅਪਡੇਟ ਨਹੀਂ।
BJ ਮੈਡੀਕਲ ਕਾਲਜ ’ਤੇ ਅਸਰ
ਇਸ ਹਾਦਸੇ ਕਾਰਨ ਹੋਸਟਲ ਦੀ ਇਮਾਰਤ ਅਤੇ ਕੈਂਟੀਨ ਨੂੰ ਭਾਰੀ ਨੁਕਸਾਨ ਹੋਇਆ। ਜਹਾਜ਼ ਦਾ ਮਲਬਾ ਸਿਵਿਲ ਹਸਪਤਾਲ ਦੀਆਂ ਇਮਾਰਤਾਂ ’ਤੇ ਵੀ ਡਿੱਗਿਆ। ਇਸ ‘ਚ ਕਈ ਵਿਦਿਆਰਥੀਆਂ ਦੀ ਮੌਤ ਦਾ ਖਦਸ਼ਾ ਜਤਾਇਆ ਗਿਆ ਹੈ, ਪਰ ਅਧਿਕਾਰਤ ਪੁਸ਼ਟੀ ਨਹੀਂ ਕੀਤੀ ਗਈ। ਜ਼ਖਮੀਆਂ ਨੂੰ ਸਿਵਿਲ ਅਤੇ ਕੇਡੀ ਹਸਪਤਾਲ ’ਚ ਭਰਤੀ ਕੀਤਾ ਗਿਆ।
