ਨਵੀਂ ਦਿੱਲੀ : ਦੇਸ਼ ਦੀ ਸਭ ਤੋਂ ਆਧੁਨਿਕ ਟ੍ਰੇਨਾਂ ਵਿੱਚ ਸ਼ੁਮਾਰ ਵੰਦੇ ਭਾਰਤ ਦੀ ਸੁਰੱਖਿਆ ਨੂੰ ਲੈ ਕੇ ਇੱਕ ਅਜਿਹਾ ਖੁਲਾਸਾ ਹੋਇਆ ਹੈ, ਜਿਸ ਨੂੰ ਸੁਣ ਕੇ ਤੁਸੀਂ ਵੀ ਹੈਰਾਨ ਰਹਿ ਜਾਓਗੇ। ਸੋਚੋ, ਇੱਕ ਟ੍ਰੇਨ ਦੀ ਬ੍ਰੇਕਿੰਗ ਪ੍ਰਣਾਲੀ ਠੀਕ ਤਰ੍ਹਾਂ ਕੰਮ ਨਹੀਂ ਕਰ ਰਹੀ… ਚਾਲਕ ਦਲ ਵੱਲੋਂ ਇਸ ਬਾਰੇ ਚਿਤਾਵਨੀ ਵੀ ਦਿੱਤੀ ਜਾ ਰਹੀ ਹੈ… ਪਰ ਇਸ ਦੇ ਬਾਵਜੂਦ ਟ੍ਰੇਨ ਨੂੰ ਸੈਂਕੜੇ ਕਿਲੋਮੀਟਰ ਤੱਕ ਦੌੜਾਇਆ ਜਾਂਦਾ ਹੈ। ਜੀ ਹਾਂ! ਇਹ ਮਾਮਲਾ ਵੰਦੇ ਭਾਰਤ ਟ੍ਰੇਨ ਨਾਲ ਜੁੜਿਆ ਹੋਇਆ ਹੈ, ਜਿਸ ਨੂੰ ਖ਼ਰਾਬ ਬ੍ਰੇਕਿੰਗ ਪ੍ਰਣਾਲੀ ਦੇ ਬਾਵਜੂਦ 463 ਕਿਲੋਮੀਟਰ ਤੱਕ ਲਿਜਾਇਆ ਗਿਆ। ਹੁਣ ਇਸ ਗੰਭੀਰ ਲਾਪਰਵਾਹੀ ਨੂੰ ਲੈ ਕੇ ਰੇਲਵੇ ਵਿਭਾਗ ਨੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਦਰਅਸਲ, ਇਹ ਘਟਨਾ 24 ਅਕਤੂਬਰ ਦੀ ਦੱਸੀ ਜਾ ਰਹੀ ਹੈ। ਜਾਣਕਾਰੀ ਮੁਤਾਬਕ ਖਾਲੀ ਚੇਅਰ ਕਾਰ ਵਾਲੀ ਵੰਦੇ ਭਾਰਤ ਟ੍ਰੇਨ ਨੂੰ ਝਾਰਖੰਡ ਦੇ ਹਟੀਆ ਤੋਂ ਉੱਤਰ ਪ੍ਰਦੇਸ਼ ਦੇ ਝਾਂਸੀ ਤੱਕ ਲਿਜਾਇਆ ਜਾਣਾ ਸੀ। ਇਸ ਲਈ ਟ੍ਰੇਨ ਨੂੰ ਮਾਲਗੱਡੀ ਦੇ ਇੰਜਣ ਨਾਲ ਜੋੜ ਕੇ ਲਿਜਾਣ ਦੀ ਯੋਜਨਾ ਬਣਾਈ ਗਈ ਸੀ। ਪਰ ਇਸ ਪੂਰੀ ਪ੍ਰਕਿਰਿਆ ਵਿੱਚ ਸਭ ਤੋਂ ਅਹਿਮ ਚੀਜ਼ ਸੀ ਬ੍ਰੇਕਿੰਗ ਸਿਸਟਮ। ਨਿਯਮਾਂ ਮੁਤਾਬਕ ਵੰਦੇ ਭਾਰਤ ਦੇ ਡੱਬਿਆਂ ਦੀ ਬ੍ਰੇਕਿੰਗ ਪ੍ਰਣਾਲੀ ਨੂੰ ਮਾਲਗੱਡੀ ਦੇ ਇੰਜਣ ਦੀ ਬ੍ਰੇਕਿੰਗ ਪ੍ਰਣਾਲੀ ਨਾਲ ਠੀਕ ਤਰ੍ਹਾਂ ਜੋੜਨਾ ਜ਼ਰੂਰੀ ਸੀ, ਤਾਂ ਜੋ ਲੋੜ ਪੈਣ ‘ਤੇ ਪੂਰੀ ਟ੍ਰੇਨ ਨੂੰ ਸੁਰੱਖਿਅਤ ਢੰਗ ਨਾਲ ਰੋਕਿਆ ਜਾ ਸਕੇ। ਪਰ ਇੱਥੇ ਹੀ ਵੱਡੀ ਲਾਪਰਵਾਹੀ ਹੋ ਗਈ।
ਇਹ ਵੀ ਪੜ੍ਹੌ : ਬੀਬੀ ਜਗੀਰ ਕੌਰ ਦੀ ਘਰ ਵਾਪਸੀ! ਸੁਖਬੀਰ ਬਾਦਲ ਨੇ ਸੌਂਪੀ ਵੱਡੀ ਜ਼ਿੰਮੇਵਾਰੀ!
ਅਧਿਕਾਰੀਆਂ ਅਨੁਸਾਰ, ਰੇਲਵੇ ਮੁਲਾਜ਼ਮਾਂ ਵੱਲੋਂ ਦੋਵਾਂ ਬ੍ਰੇਕਿੰਗ ਪ੍ਰਣਾਲੀਆਂ ਨੂੰ ਸਹੀ ਢੰਗ ਨਾਲ ਜੋੜਨ ਦਾ ਪ੍ਰਬੰਧ ਯਕੀਨੀ ਨਹੀਂ ਬਣਾਇਆ ਗਿਆ। ਹੈਰਾਨੀ ਦੀ ਗੱਲ ਇਹ ਹੈ ਕਿ ਟ੍ਰੇਨ ਦੇ ਚਾਲਕ ਦਲ ਵੱਲੋਂ ਵੀ ਇਸ ਸਮੱਸਿਆ ਬਾਰੇ ਜਾਣਕਾਰੀ ਦਿੱਤੀ ਗਈ ਸੀ। ਪਰ ਇਸ ਦੇ ਬਾਵਜੂਦ ਚਿਤਾਵਨੀਆਂ ਨੂੰ ਨਜ਼ਰਅੰਦਾਜ਼ ਕਰ ਦਿੱਤਾ ਗਿਆ ਅਤੇ ਟ੍ਰੇਨ ਨੂੰ ਲੰਬੀ ਦੂਰੀ ਤੱਕ ਲਿਜਾਇਆ ਗਿਆ। ਇਸ ਲਾਪਰਵਾਹੀ ਕਾਰਨ ਸਿਰਫ਼ ਵੰਦੇ ਭਾਰਤ ਹੀ ਨਹੀਂ, ਸਗੋਂ ਉਸੇ ਰੇਲ ਰੂਟ ‘ਤੇ ਚੱਲਣ ਵਾਲੀਆਂ ਹੋਰ ਯਾਤਰੀ ਟ੍ਰੇਨਾਂ ਦੀ ਸੁਰੱਖਿਆ ਵੀ ਖ਼ਤਰੇ ਵਿੱਚ ਪੈ ਸਕਦੀ ਸੀ।ਦੱਖਣ ਪੂਰਬੀ ਰੇਲਵੇ ਨੇ ਇਸ ਮਾਮਲੇ ਨੂੰ ਸੁਰੱਖਿਆ ਦੀ ਗੰਭੀਰ ਚਿੰਤਾ ਦੱਸਿਆ ਹੈ। ਰੇਲਵੇ ਜ਼ੋਨ ਮੁਤਾਬਕ ਲੋੜੀਂਦੀ ਬ੍ਰੇਕਿੰਗ ਸਮਰੱਥਾ ਤੋਂ ਬਿਨਾਂ ਟ੍ਰੇਨ ਚਲਾਉਣਾ ਬੇਹੱਦ ਖ਼ਤਰਨਾਕ ਹੈ। ਇਸ ਨਾਲ ਵੱਡਾ ਹਾਦਸਾ ਵਾਪਰ ਸਕਦਾ ਹੈ, ਜਿਸ ਵਿੱਚ ਰੇਲਵੇ ਮੁਲਾਜ਼ਮਾਂ ਅਤੇ ਯਾਤਰੀਆਂ ਦੀ ਜਾਨ ਵੀ ਜਾ ਸਕਦੀ ਹੈ। ਇਸ ਮਾਮਲੇ ਦੀ ਚਰਚਾ ਇਸ ਲਈ ਵੀ ਵਧ ਗਈ ਹੈ ਕਿਉਂਕਿ 11 ਨਵੰਬਰ ਨੂੰ ਕੋਲਕਾਤਾ-ਸਾਇਰੰਗ ਐਕਸਪ੍ਰੈੱਸ ਵੀ ਆਸਾਮ ਵਿੱਚ ਪਟੜੀ ਤੋਂ ਉਤਰ ਗਈ ਸੀ। ਇਸ ਘਟਨਾ ਨੂੰ ਵੀ ਰੇਲਵੇ ਦੀ ਸੁਰੱਖਿਆ ਅਤੇ ਲਾਪਰਵਾਹੀ ਨਾਲ ਜੋੜ ਕੇ ਦੇਖਿਆ ਜਾ ਰਿਹਾ ਹੈ। ਫਿਲਹਾਲ ਵੰਦੇ ਭਾਰਤ ਨਾਲ ਜੁੜੇ ਇਸ ਮਾਮਲੇ ਵਿੱਚ ਜਾਂਚ ਜਾਰੀ ਹੈ ਅਤੇ ਹੁਣ ਦੇਖਣਾ ਹੋਵੇਗਾ ਕਿ ਇਸ ਗੰਭੀਰ ਗਲਤੀ ਲਈ ਕਿਹੜੇ ਅਧਿਕਾਰੀਆਂ ਜਾਂ ਮੁਲਾਜ਼ਮਾਂ ਦੀ ਜ਼ਿੰਮੇਵਾਰੀ ਤੈਅ ਹੁੰਦੀ ਹੈ।

