ਨਵੀਂ ਦਿੱਲੀ: ਸੁਪਰੀਮ ਕੋਰਟ ਨੇ ਪੈਟਰੋਲ ਪੰਪਾਂ ’ਤੇ ਵੇਚੇ ਜਾਣ ਵਾਲੇ ਪੈਟਰੋਲ ਵਿੱਚ ਇਥੇਨਾਲ ਦੀ ਮਾਤਰਾ ਦੱਸਣ ਅਤੇ ਬਿੱਲ ਜਾਂ ਰਸੀਦ ’ਤੇ ਵੀ ਇਸ ਦਾ ਫੀਸਦ ਦਰਜ ਕਰਨ ਦੀ ਮੰਗ ਵਾਲੀ ਪਟੀਸ਼ਨ ’ਤੇ ਸੁਣਵਾਈ ਕਰਨ ਤੋਂ ਇਨਕਾਰ ਕਰ ਦਿੱਤਾ ਹੈ। ਜਸਟਿਸ ਐੱਮ.ਐੱਮ. ਸੁੰਦਰੇਸ਼ ਅਤੇ ਪੀ.ਬੀ. ਵਰਾਲੇ ਦੀ ਬੈਂਚ ਨੇ ਇਹ ਫੈਸਲਾ ਸੁਣਾਇਆ।
ਪਟੀਸ਼ਨਰ ਨੇ ਕਿਹਾ- ‘ਮੈਨੂੰ ਜਾਣਨ ਦਾ ਹੱਕ ਹੈ’
ਪਟੀਸ਼ਨਰ ਦੇ ਵਕੀਲ ਐੱਨ.ਕੇ. ਗੋਸਵਾਮੀ ਨੇ ਅਦਾਲਤ ਵਿੱਚ ਪੈਟਰੋਲ ਦੀ ਰਸੀਦ ਦਾ ਹਵਾਲਾ ਦਿੰਦਿਆਂ ਕਿਹਾ ਕਿ ਇਸ ਵਿੱਚ ਇਥੇਨਾਲ ਦਾ ਕੋਈ ਜ਼ਿਕਰ ਨਹੀਂ ਹੈ। ਉਨ੍ਹਾਂ ਕਿਹਾ ਕਿ ਇੱਕ ਨਾਗਰਿਕ ਨੂੰ ਇਹ ਜਾਣਨ ਦਾ ਹੱਕ ਹੈ ਕਿ ਉਹ ਕੀ ਖਰੀਦ ਰਿਹਾ ਹੈ।
ਗੋਸਵਾਮੀ ਨੇ ਇਹ ਵੀ ਕਿਹਾ ਕਿ ਪਿਛਲੀ ਸੁਣਵਾਈ ਦੌਰਾਨ ਅਟਾਰਨੀ ਜਨਰਲ ਨੇ ਇਸ ਨੂੰ ਇੱਕ ਪ੍ਰਯੋਗ ਦੱਸਿਆ ਸੀ ਅਤੇ ਉਹ ਚਾਹੁੰਦੇ ਹਨ ਕਿ ਸਰਕਾਰ ਇਸ ਬਾਰੇ ਹਲਫ਼ਨਾਮੇ ਰਾਹੀਂ ਸਪਸ਼ਟੀਕਰਨ ਦੇਵੇ।
ਅਦਾਲਤ ਨੇ ਹਾਈਕੋਰਟ ਜਾਣ ਦੀ ਦਿੱਤੀ ਛੋਟ
ਅਟਾਰਨੀ ਜਨਰਲ ਆਰ. ਵੈਂਕਟਰਮਣੀ ਨੇ ਕਿਹਾ ਕਿ ਉਹ ਚਾਹੁੰਦੇ ਹਨ ਕਿ ਭਾਰਤ ਸਰਕਾਰ ਇਸ ਮਾਮਲੇ ’ਤੇ ਜਵਾਬ ਦੇਵੇ। ਇਸ ’ਤੇ ਵਕੀਲ ਨੇ ਕਿਹਾ ਕਿ ਗੱਲ ਸਿਰਫ਼ ਉਨ੍ਹਾਂ ਦੀ ਨਹੀਂ, ਸਗੋਂ ਦੇਸ਼ ਦੇ ਸਾਰੇ ਨਾਗਰਿਕਾਂ ਦੀ ਹੈ। ਉਨ੍ਹਾਂ ਮੁਤਾਬਕ ਲੋਕਾਂ ਨੂੰ ਇਹ ਜਾਣਨ ਦਾ ਅਧਿਕਾਰ ਹੈ ਕਿ ਉਹ ਕੀ ਖਰੀਦ ਰਹੇ ਹਨ।
ਹਾਲਾਂਕਿ ਸੁਪਰੀਮ ਕੋਰਟ ਨੇ ਮਾਮਲੇ ਦੀ ਸੁਣਵਾਈ ਕਰਨ ਤੋਂ ਇਨਕਾਰ ਕਰ ਦਿੱਤਾ ਅਤੇ ਪਟੀਸ਼ਨਰ ਨੂੰ ਇਸ ਮੁੱਦੇ ’ਤੇ ਹਾਈਕੋਰਟ ਜਾਣ ਦੀ ਛੋਟ ਦੇ ਦਿੱਤੀ।
ਪਟੀਸ਼ਨ ਵਿੱਚ ਕੀ ਮੰਗ ਕੀਤੀ ਗਈ ਸੀ?
ਪਟੀਸ਼ਨ ਵਿੱਚ ਮੰਗ ਕੀਤੀ ਗਈ ਸੀ ਕਿ ਹਰ ਪੈਟਰੋਲ ਡਿਸਪੈਂਸਿੰਗ ਨੋਜ਼ਲ ’ਤੇ ਇਥੇਨਾਲ ਦੀ ਸਹੀ ਮਾਤਰਾ ਸਪਸ਼ਟ ਕੀਤੀ ਜਾਵੇ। ਇਸ ਤੋਂ ਇਲਾਵਾ ਵੇਚੇ ਗਏ ਪੈਟਰੋਲ ਵਿੱਚ ਇਥੇਨਾਲ ਦਾ ਪ੍ਰਤੀਸ਼ਤ ਹਰ ਚਲਾਨ, ਰਸੀਦ ਜਾਂ ਬਿੱਲ ’ਤੇ ਸਾਫ਼-ਸਾਫ਼ ਦਰਜ ਕਰਨ ਲਈ ਵੀ ਨਿਰਦੇਸ਼ ਦੇਣ ਦੀ ਮੰਗ ਕੀਤੀ ਗਈ ਸੀ।
E20 ਪੈਟਰੋਲ ਵਿੱਚ 20 ਫੀਸਦੀ ਇਥੇਨਾਲ ਅਤੇ 80 ਫੀਸਦੀ ਪੈਟਰੋਲ ਹੁੰਦਾ ਹੈ। ਇਸ ਦਾ ਉਦੇਸ਼ ਕੱਚੇ ਤੇਲ ਦੀ ਦਰਾਮਦ ਘਟਾਉਣਾ, ਪ੍ਰਦੂਸ਼ਣ ਘਟਾਉਣਾ ਅਤੇ ਦੇਸ਼ ਵਿੱਚ ਤਿਆਰ ਇਥੇਨਾਲ ਮਿਲੇ ਪੈਟਰੋਲ ਦੀ ਵਰਤੋਂ ਵਧਾਉਣਾ ਹੈ।
ਪਰ E20 ਦੀ ਸ਼ੁਰੂਆਤ ਤੋਂ ਬਾਅਦ ਇਸ ਨੂੰ ਲੈ ਕੇ ਕਈ ਸ਼ਿਕਾਇਤਾਂ ਵੀ ਸਾਹਮਣੇ ਆਈਆਂ। ਕਿਹਾ ਗਿਆ ਕਿ ਪੁਰਾਣੀਆਂ ਗੱਡੀਆਂ, ਜੋ E20 ਲਈ ਤਿਆਰ ਨਹੀਂ ਸਨ, ਉਨ੍ਹਾਂ ਵਿੱਚ ਸਮੱਸਿਆਵਾਂ ਆ ਸਕਦੀਆਂ ਹਨ। ਇਨ੍ਹਾਂ ਵਿੱਚ ਫਿਊਲ ਸਿਸਟਮ ਵਿੱਚ ਜੰਗ ਲੱਗਣਾ, ਗੱਡੀ ਖਰਾਬ ਹੋਣਾ ਅਤੇ ਮਾਈਲੇਜ ਘਟਣਾ ਵਰਗੀਆਂ ਚਿੰਤਾਵਾਂ ਸ਼ਾਮਲ ਹਨ।
ਪੁਰਾਣੀਆਂ ਗੱਡੀਆਂ ਨੂੰ ਲੈ ਕੇ ਸਵਾਲ
ਇਸ ਤੋਂ ਬਾਅਦ ਵਾਹਨ ਕੰਪਨੀਆਂ ਨੇ E20 ਨਾਲ ਚੱਲਣ ਵਾਲੀਆਂ ਨਵੀਆਂ ਗੱਡੀਆਂ ਬਣਾਉਣੀਆਂ ਸ਼ੁਰੂ ਕੀਤੀਆਂ। ਹਾਲਾਂਕਿ 2023 ਤੋਂ ਪਹਿਲਾਂ ਵੇਚੀਆਂ ਗਈਆਂ ਪੁਰਾਣੀਆਂ ਗੱਡੀਆਂ ਨੂੰ ਲੈ ਕੇ ਸਵਾਲ ਅਜੇ ਵੀ ਮੌਜੂਦ ਹਨ।
ਹਾਲ ਹੀ ਵਿੱਚ ਰਾਏਪੁਰ ਦੀ ਇੱਕ ਖਪਤਕਾਰ ਅਦਾਲਤ ਨੇ ਮਾਰੂਤੀ ਸੁਜ਼ੂਕੀ ਨੂੰ ਇੱਕ ਵਿਅਕਤੀ ਨੂੰ E20 ਇੰਜਣ ਵਾਲੀ ਨਵੀਂ ਗ੍ਰੈਂਡ ਵਿਟਾਰਾ ਦੇਣ ਦਾ ਹੁਕਮ ਦਿੱਤਾ ਸੀ। ਉਸ ਵਿਅਕਤੀ ਦੀ ਪੁਰਾਣੀ ਗੱਡੀ ਕਥਿਤ ਤੌਰ ’ਤੇ E20 ਈਂਧਨ ਕਾਰਨ ਖਰਾਬ ਹੋ ਗਈ ਸੀ।
