ਲੁਧਿਆਣਾ: ਲੁਧਿਆਣਾ ਵਿੱਚ ਆਮ ਆਦਮੀ ਪਾਰਟੀ (ਆਪ) ਨੇ ਵੱਡਾ ਸਮਾਗਮ ਕੀਤਾ, ਜਿਸ ਵਿੱਚ ਮੁੱਖ ਮੰਤਰੀ ਭਗਵੰਤ ਮਾਨ, ਪਾਰਟੀ ਮੁਖੀ ਅਰਵਿੰਦ ਕੇਜਰੀਵਾਲ, ਦਿੱਲੀ ਦੇ ਸਾਬਕਾ ਸਿੱਖਿਆ ਮੰਤਰੀ ਮਨੀਸ਼ ਸਿਸੋਦੀਆ ਅਤੇ ਪੰਜਾਬ ਪ੍ਰਧਾਨ ਅਮਨ ਅਰੋੜਾ ਨੇ ਸ਼ਿਰਕਤ ਕੀਤੀ। ਫਿਰੋਜ਼ਪੁਰ ਰੋਡ ਸਥਿਤ ਕਿੰਗਜ਼ ਵਿਲਾ ਵਿਖੇ ਹੋਏ ਇਸ ਸਮਾਗਮ ਵਿੱਚ ਹਾਲ ਹੀ ਵਿੱਚ ਜਿਤੇ ਉਪ-ਚੋਣਾਂ ਦੀ ਸਫਲਤਾ ਲਈ ਵੋਟਰਾਂ ਦਾ ਧੰਨਵਾਦ ਕੀਤਾ ਗਿਆ।
ਮੁੱਖ ਮੰਤਰੀ ਮਾਨ ਨੇ ਕਿਹਾ, “ ਅਸੀਂ ਲਗਾਤਾਰ ਲੋਕ ਹਿੱਤਾਂ ਲਈ ਕੰਮ ਕਰ ਰਹੇ ਹਾਂ। ਪੰਜਾਬ ਵਿੱਚ ਸਿੱਖਿਆ ਦੇ ਮਾਮਲੇ ਵਿੱਚ 2017 ਵਿੱਚ 29ਵੇਂ ਸਥਾਨ ਤੋਂ 2025 ਵਿੱਚ ਸਾਰੀਆਂ ਸ਼੍ਰੇਣੀਆਂ ਵਿੱਚ ਪਹਿਲਾ ਸਥਾਨ ਹਾਸਲ ਕੀਤਾ ਹੈ।” ਉਨ੍ਹਾਂ ਨੇ ਪੰਜਾਬ ਨੂੰ ਮੁੜ ‘ਰੰਗਲਾ ਪੰਜਾਬ’ ਬਣਾਉਣ ਦਾ ਵਾਅਦਾ ਕੀਤਾ। ਮਾਨ ਨੇ ਵਿਰੋਧੀਆਂ ’ਤੇ ਨਿਸ਼ਾਨਾ ਸਾਧਦਿਆਂ ਕਿਹਾ, “ਕਾਂਗਰਸ ਅਤੇ ਅਕਾਲੀ ਦਲ ਨੇ ਪੰਜਾਬ ਨੂੰ ਲੁੱਟਿਆ ਅਤੇ ਧਰਮ ਦੇ ਨਾਂ ’ਤੇ ਲੜਾਇਆ। ਅੱਜ ਉਹ ਆਪਣੀ ਸਿਆਸੀ ਜਮੀਨ ਗੁਆ ਰਹੇ ਹਨ।”
ਮਾਨ ਨੇ ਅਕਾਲੀ ਦਲ ਦੇ ਨੇਤਾ ਬਿਕਰਮਜੀਤ ਮਜੀਠੀਆ ’ਤੇ ਵੀ ਤਿੱਖਾ ਹਮਲਾ ਕੀਤਾ। ਉਨ੍ਹਾਂ ਕਿਹਾ, “ਜਿਨ੍ਹਾਂ ਨੇ ਜਲ੍ਹਿਆਂਵਾਲਾ ਬਾਗ ਦੇ ਕਾਤਲ ਜਨਰਲ ਡਾਇਰ ਨੂੰ ਰੋਟੀਆਂ ਖਵਾਈਆਂ, ਅੱਜ ਉਹ ਨਾਭਾ ਜੇਲ੍ਹ ਵਿੱਚ ਹਨ। ਅਕਾਲੀ ਦਲ ਨੇ ਮਜੀਠੀਆ ਦੇ ਸਮਰਥਨ ਵਿੱਚ ਸੜਕਾਂ ’ਤੇ ਉੱਤਰਨ ਦੀ ਅਪੀਲ ਕੀਤੀ, ਪਰ ਲੋਕਾਂ ਨੇ ਘਰਾਂ ਦੇ ਤਾਲੇ ਲਾ ਦਿੱਤੇ।” ਉਨ੍ਹਾਂ ਨੇ ਨਸ਼ਿਆਂ ਵਿਰੁੱਧ ਸਖਤ ਕਾਰਵਾਈ ਦਾ ਵਾਅਦਾ ਕੀਤਾ, ਕਹਿੰਦਿਆਂ ਕਿ “ਕਾਨੂੰਨੀ ਪ੍ਰਕਿਰਿਆ ਵਿੱਚ ਸਮਾਂ ਲੱਗਦਾ ਹੈ, ਪਰ ਦੋਸ਼ੀਆਂ ਨੂੰ ਸਜ਼ਾ ਜ਼ਰੂਰ ਮਿਲੇਗੀ।”
ਮਾਨ ਨੇ ਪਾਰਟੀ ਦੀਆਂ ਪ੍ਰਾਪਤੀਆਂ ’ਤੇ ਚਾਨਣਾ ਪਾਇਆ, “ਅਸੀਂ 55,000 ਸਰਕਾਰੀ ਨੌਕਰੀਆਂ ਯੋਗਤਾ ਦੇ ਆਧਾਰ ’ਤੇ ਦਿੱਤੀਆਂ, ਬਿਨਾਂ ਕਿਸੇ ਰਿਸ਼ਵਤ ਦੇ। ਸਾਡੇ ਮੰਤਰੀਆਂ ਦਾ ਕਿਸੇ ਠੇਕੇ ਵਿੱਚ ਹਿੱਸਾ ਨਹੀਂ।” ਉਨ੍ਹਾਂ ਨੇ ਬਿਜਲੀ ਮੰਤਰੀ ਹਰਭਜਨ ਸਿੰਘ ਈਟੀਓ ਦੀ ਤਾਰੀਫ ਕੀਤੀ, ਜਿਨ੍ਹਾਂ ਦੇ ਪਿਤਾ ਵਿਆਹਾਂ ਵਿੱਚ ਬੈਂਡ ਨਾਲ ਕੰਮ ਕਰਦੇ ਸਨ, ਅਤੇ ਅੱਜ ਉਹ ਮੰਤਰੀ ਹਨ। “ਇਹ ਲੋਕਾਂ ਦੀ ਤਾਕਤ ਹੈ। ਅਸੀਂ ਸਿਆਸਤ ਸਿੱਖਣ ਨਹੀਂ, ਸਿਖਾਉਣ ਆਏ ਹਾਂ,” ਮਾਨ ਨੇ ਕਿਹਾ।
ਉਨ੍ਹਾਂ ਨੇ ਵਿਰੋਧੀ ਨੇਤਾ ਪ੍ਰਤਾਪ ਸਿੰਘ ਬਾਜਵਾ, ਚੰਨੀ ਅਤੇ ਰਵਨੀਤ ਬਿੱਟੂ ’ਤੇ ਵੀ ਤੰਜ ਕੱਸਿਆ, “ਇਹ ਲੋਕ ਚਿੱਟੇ ਦੇ ਸਮਰਥਨ ਵਿੱਚ ਬੋਲੇ ਅਤੇ ਬਾਅਦ ਵਿੱਚ ਮੁਆਫੀ ਮੰਗੀ। ਅਸੀਂ ਸਦਨ ਦੇ ਸੈਸ਼ਨ ਵਿੱਚ ਇਨ੍ਹਾਂ ਤੋਂ 2021 ਤੋਂ 2024 ਤੱਕ ਦੀਆਂ ਗੱਲਾਂ ਅਤੇ ਕੰਮਾਂ ਦਾ ਹਿਸਾਬ ਮੰਗਾਂਗੇ।”
