ਜਲੰਧਰ: ਇੰਡੀਗੋ ਏਅਰਲਾਈਨਜ਼ ਨੇ ਅੱਜ ਤੋਂ ਆਦਮਪੁਰ (ਜਲੰਧਰ) ਹਵਾਈ ਅੱਡੇ ਤੋਂ ਮੁੰਬਈ ਲਈ ਸਿੱਧੀ ਉਡਾਣ ਸ਼ੁਰੂ ਕਰ ਦਿੱਤੀ ਹੈ। ਇਸ ਨਵੀਂ ਸੇਵਾ ਨਾਲ ਸਿੱਖ ਸ਼ਰਧਾਲੂਆਂ, ਖਾਸ ਕਰਕੇ ਤਖਤ ਸ੍ਰੀ ਹਜ਼ੂਰ ਸਾਹਿਬ (ਨਾਂਦੇੜ) ਜਾਣ ਵਾਲਿਆਂ ਨੂੰ ਵੱਡੀ ਸਹੂਲਤ ਮਿਲੇਗੀ। ਪਹਿਲੀ ਉਡਾਣ ਅੱਜ ਦੁਪਹਿਰ ਮੁੰਬਈ ਤੋਂ ਯਾਤਰੀਆਂ ਨੂੰ ਲੈ ਕੇ ਆਦਮਪੁਰ ਹਵਾਈ ਅੱਡੇ ’ਤੇ ਉਤਰੀ।
ਰਾਜ ਸਭਾ ਮੈਂਬਰ ਸਤਨਾਮ ਸਿੰਘ ਸੰਧੂ ਨੇ ਇਸ ਉਡਾਣ ਨੂੰ ਸਿੱਖ ਸੰਗਤ ਦੀ ਸਾਲਾਂ ਪੁਰਾਣੀ ਮੰਗ ਦੀ ਪੂਰਤੀ ਦੱਸਿਆ। ਉਨ੍ਹਾਂ ਕਿਹਾ ਕਿ ਪਹਿਲਾਂ ਪੰਜਾਬ ਤੋਂ ਤਖਤ ਸ੍ਰੀ ਹਜ਼ੂਰ ਸਾਹਿਬ ਪਹੁੰਚਣਾ, ਖਾਸ ਕਰਕੇ ਬਜ਼ੁਰਗ ਸ਼ਰਧਾਲੂਆਂ ਲਈ, ਕਾਫੀ ਮੁਸ਼ਕਲ ਸੀ, ਕਿਉਂਕਿ ਕੋਈ ਸਿੱਧੀ ਉਡਾਣ ਨਹੀਂ ਸੀ। ਇਹ ਸੇਵਾ ਕੇਂਦਰ ਸਰਕਾਰ ਦੀ UDAN ਯੋਜਨਾ ਦਾ ਹਿੱਸਾ ਹੈ, ਜੋ ਸਿੱਖ ਭਾਈਚਾਰੇ ਪ੍ਰਤੀ ਸਰਕਾਰ ਦੇ ਸਤਿਕਾਰ ਨੂੰ ਦਰਸਾਉਂਦੀ ਹੈ।
ਉਡਾਣ ਦਾ ਸਮਾਂ-ਸਾਰਣੀ
ਇੰਡੀਗੋ ਦੀ ਇਹ ਸਿੱਧੀ ਉਡਾਣ ਲਗਭਗ ਢਾਈ ਘੰਟੇ ਦੀ ਹੋਵੇਗੀ। ਫਲਾਈਟ ਨੰਬਰ 6E 5931 ਦੁਪਹਿਰ 12:55 ਵਜੇ ਮੁੰਬਈ ਤੋਂ ਰਵਾਨਾ ਹੋਵੇਗੀ ਅਤੇ 3:15 ਵਜੇ ਆਦਮਪੁਰ ਪਹੁੰਚੇਗੀ। ਆਦਮਪੁਰ ਤੋਂ ਫਲਾਈਟ ਨੰਬਰ 6E 5932 ਦੁਪਹਿਰ 3:50 ਵਜੇ ਉਡਾਣ ਭਰੇਗੀ ਅਤੇ ਸ਼ਾਮ 6:30 ਵਜੇ ਮੁੰਬਈ ਪਹੁੰਚੇਗੀ। ਇਹ ਸਮਾਂ-ਸਾਰਣੀ ਰੋਜ਼ਾਨਾ ਜਾਰੀ ਰਹੇਗੀ। ਇਸ ਸੇਵਾ ਨਾਲ ਪੰਜਾਬ ਦੇ ਸਿੱਖ ਸੰਗਤ ਅਤੇ ਹੋਰ ਯਾਤਰੀਆਂ ਨੂੰ ਧਾਰਮਿਕ ਅਤੇ ਵਪਾਰਕ ਸਫਰ ਵਿੱਚ ਵੱਡੀ ਸਹੂਲਤ ਮਿਲੇਗੀ।
ਜਲੰਧਰ ਅਤੇ ਆਸਪਾਸ ਦੇ ਖੇਤਰਾਂ ਨੂੰ ਲਾਭ
ਇਹ ਨਵੀਂ ਉਡਾਣ ਨਾ ਸਿਰਫ਼ ਧਾਰਮਿਕ ਸਫਰ ਨੂੰ ਸੌਖਾ ਕਰੇਗੀ, ਸਗੋਂ ਦੋਆਬੇ ਦੇ ਵਪਾਰੀਆਂ ਅਤੇ ਖੇਤਰ ਦੀ ਤਰੱਕੀ ਵਿੱਚ ਵੀ ਯੋਗਦਾਨ ਪਾਵੇਗੀ। ਜਲੰਧਰ, ਨਵਾਂਸ਼ਹਿਰ, ਕਪੂਰਥਲਾ, ਅਤੇ ਆਸਪਾਸ ਦੇ ਖੇਤਰਾਂ ਦੇ ਲੋਕਾਂ ਨੂੰ ਇਸ ਸਿੱਧੀ ਉਡਾਣ ਦਾ ਭਰਪੂਰ ਲਾਭ ਮਿਲੇਗਾ।
