ਕੁੱਲੂ: ਹਿਮਾਚਲ ਪ੍ਰਦੇਸ਼ ਦੀ ਪਾਰਵਤੀ ਘਾਟੀ ‘ਚ ਲੋਕਾਂ ਦੇ ਲਾਪਤਾ ਹੋਣ ਦੇ ਮਾਮਲੇ ਲਗਾਤਾਰ ਵਧਦੇ ਜਾ ਰਹੇ ਹਨ। ਤਾਜ਼ਾ ਮਾਮਲੇ ‘ਚ ਮੁੰਬਈ ਦਾ 22 ਸਾਲਾ ਸੈਲਾਨੀ ਲਾਪਤਾ ਹੈ। ਲਾਪਤਾ ਹੋਣ ਤੋਂ 22 ਦਿਨ ਬਾਅਦ ਵੀ ਨੌਜਵਾਨ ਦਾ ਕੋਈ ਪਤਾ ਨਹੀਂ ਲੱਗ ਸਕਿਆ ਹੈ। ਜਦਕਿ ਹੈਲੀਕਾਪਟਰ, ਬਚਾਅ ਦਲ ਅਤੇ ਸਥਾਨਕ ਲੋਕਾਂ ਦੀ ਮਦਦ ਨਾਲ ਸਰਚ ਆਪਰੇਸ਼ਨ ਵੀ ਚਲਾਇਆ ਗਿਆ ਹੈ। ਪਰ ਲਾਪਤਾ ਨੌਜਵਾਨ ਅਕਸ਼ੈ ਸੇਠੀ ਬਾਰੇ ਕੁਝ ਪਤਾ ਨਹੀਂ ਲੱਗ ਸਕਿਆ ਹੈ। ਫਿਲਹਾਲ ਕੁੱਲੂ ਪੁਲਿਸ ਨੇ ਮਾਮਲਾ ਦਰਜ ਕਰ ਲਿਆ ਹੈ ਅਤੇ ਉਸ ਦੀ ਭਾਲ ਕੀਤੀ ਜਾ ਰਹੀ ਹੈ। ਪਰ ਇਸ ਘਟਨਾ ਤੋਂ ਬਾਅਦ ਪਾਰਵਤੀ ਘਾਟੀ ‘ਚ ਲੋਕਾਂ ਦੇ ਲਾਪਤਾ ਹੋਣ ‘ਤੇ ਸਵਾਲ ਉੱਠ ਰਹੇ ਹਨ।
ਜਾਣਕਾਰੀ ਮੁਤਾਬਕ 22 ਸਾਲਾ ਅਕਸ਼ੈ ਸੇਠੀ ਇਕੱਲਾ ਹੀ ਕਸੋਲ ਅਤੇ ਮਣੀਕਰਨ ਘੁੰਮਣ ਆਇਆ ਸੀ ਤੇ 28 ਮਈ ਨੂੰ ਲਾਪਤਾ ਹੋ ਗਿਆ। ਦੱਸਿਆ ਜਾ ਰਿਹਾ ਹੈ ਕਿ ਅਕਸ਼ੈ ਮਣੀਕਰਨ ਘਾਟੀ ਦੇ ਗ੍ਰਾਹਨ ਪਿੰਡ ਪਹੁੰਚਿਆ ਜਿੱਥੇ ਉਸ ਨੇ ਰਾਤ ਬਿਤਾਈ। ਪਰ ਉਹ ਜਿਸ ਥਾਂ ‘ਤੇ ਠਹਿਰਿਆ ਹੋਇਆ ਸੀ, ਉਹਨਾਂ ਨੂੰ ਦੱਸੇ ਬਿਨਾਂ ਸਵੇਰੇ ਹੀ ਚਲਾ ਗਿਆ ਸੀ। ਉਦੋਂ ਤੋਂ ਅਕਸ਼ੈ ਲਾਪਤਾ ਹੈ। ਉਸ ਦੀ ਆਖਰੀ ਲੋਕੇਸ਼ਨ ਪੁਲਗਾ ਦੇ ਨੇੜ੍ਹੇ ਮਿਲੀ ਹੈ।
ਦੱਸਿਆ ਜਾ ਰਿਹਾ ਹੈ ਕਿ ਅਕਸ਼ੈ ਦਾ ਬੈਗ ਅੱਧਾ ਸੜਿਆ ਹੋਇਆ ਮਿਲਿਆ ਹੈ। ਪੁਲਿਸ ਨੇ ਨੇੜਲੇ ਸਾਰੇ ਹੋਟਲ ਅਤੇ ਹੋਮ ਸਟੇਅ ਸੰਚਾਲਕਾਂ ਤੋਂ ਵੀ ਪੁੱਛਗਿੱਛ ਕੀਤੀ ਹੈ। ਇਸ ਦੇ ਨਾਲ ਹੀ ਕੁੱਲੂ ਪੁਲਿਸ, ਹੈਲੀਕਾਪਟਰ ਅਤੇ ਐਸਡੀਏਐਫ ਦੀਆਂ ਟੀਮਾਂ ਵੀ ਨੌਜਵਾਨ ਦੀ ਭਾਲ ਵਿੱਚ ਜੁਟੀਆਂ ਹੋਈਆਂ ਸਨ ਪਰ ਲਾਪਤਾ ਹੋਣ ਤੋਂ 22 ਦਿਨ ਬੀਤ ਜਾਣ ਦੇ ਬਾਵਜੂਦ ਵੀ ਨੌਜਵਾਨ ਬਾਰੇ ਕੁਝ ਪਤਾ ਨਹੀਂ ਲੱਗ ਸਕਿਆ ਹੈ। ਅਕਸ਼ੈ ਦੇ ਪਿਤਾ ਕਸੋਲ ਦੀਆਂ ਵਾਦੀਆਂ ‘ਚ ਆਪਣੇ ਪੁੱਤਰ ਦੀ ਭਾਲ ‘ਚ ਲੱਗੇ ਹੋਏ ਹਨ, ਪਰ ਉਸ ਬਾਰੇ ਹਾਲੇ ਤੱਕ ਕੋਈ ਜਾਣਕਾਰੀ ਨਹੀਂ ਮਿਲੀ ਹੈ।
Disclaimer: This article is provided for informational purposes only. The information should not be taken to represent the opinions, policy, or views of Global Punjab TV, nor any of its staff, employees, or affiliates.
