ਟੋਰਾਂਟੋ: ਡਗ ਫ਼ੋਰਡ ਸਰਕਾਰ ਨੇ ਮਾਪਿਆਂ ਨੂੰ ਪ੍ਰਤੀ ਬੱਚਾ 200 ਡਾਲਰ ਦੇਣ ਦਾ ਐਲਾਨ ਕੀਤਾ ਹੈ। 18 ਸਾਲ ਤੱਕ ਉਮਰ ਵਾਲੇ ਹਰ ਬੱਚੇ ਦੇ ਮਾਪੇ 200 ਡਾਲਰ ਸਹਾਇਤਾ ਦੇ ਹੱਕਦਾਰ ਹੋਣਗੇ ਅਤੇ ਦੋ ਬੱਚਿਆਂ ਦੀ ਸੂਰਤ ‘ਚ 400 ਡਾਲਰ ਮਿਲਣਗੇ। ਉੱਥੇ ਹੀ ਦੂਜੇ ਪਾਸੇ ਵਿਸ਼ੇਸ਼ ਸਿੱਖਿਆ ਜ਼ਰੂਰਤਾਂ ਵਾਲੇ ਬੱਚਿਆਂ ਲਈ 250 ਡਾਲਰ ਦਿੱਤੇ ਜਾਣਗੇ ਅਤੇ ਉਮਰ ਹੱਦ 21 ਸਾਲ ਤੈਅ ਕੀਤੀ ਗਈ ਹੈ।
ਸਿੱਖਿਆ ਮੰਤਰੀ ਸਟੀਫ਼ਨ ਲੈਚੇ ਨੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਕਿਹਾ ਕਿ ਬਗੈਰ ਕਿਸੇ ਅੜਿੱਕੇ ਤੋਂ ਬੱਚਿਆਂ ਦੀ ਪੜ੍ਹਾਈ ਜਾਰੀ ਰੱਖਣ ਦੀ ਗਾਰੰਟੀ ਨਹੀਂ ਦਿੱਤੀ ਜਾ ਸਕਦੀ। ਦੋ ਸਾਲ ਮਹਾਂਮਾਰੀ ਕਾਰਨ ਪੜ੍ਹਾਈ ‘ਚ ਅੜਚਨ ਆਉਂਦੀ ਰਹੀ ਅਤੇ ਇਨ੍ਹਾਂ ਹਾਲਾਤਾਂ ‘ਚ ਮਾਪਿਆਂ ਦੀ ਜ਼ਿੰਮੇਵਾਰੀ ਵਧ ਗਈ। ਆਰਥਿਕ ਸਹਾਇਤਾ ਦਾ ਮੁੱਖ ਮਕਸਦ ਬੱਚਿਆਂ ਨੂੰ ਸਕੂਲੀ ਪੜ੍ਹਾਈ ਨਾਲ ਜੋੜ ਕੇ ਰੱਖਣਾ ਹੈ।
ਦੱਸਣਯੋਗ ਹੈ ਕਿ ਪਿਛਲੇ ਸਾਲ ਫੋਰਡ ਸਰਕਾਰ ਵੱਲੋਂ ਪਹਿਲੀ ਤੋਂ 12ਵੀਂ ਤੱਕ ਪੜ੍ਹ ਰਹੇ ਬੱਚਿਆਂ ਦੇ ਮਾਪਿਆਂ ਨੂੰ 400-400 ਡਾਲਰ ਦੀ ਸਹਾਇਤਾ ਦਿੱਤੀ ਗਈ ਸੀ। ਵਿਸ਼ੇਸ਼ ਜ਼ਰੂਰਤਾਂ ਵਾਲੇ ਬੱਚਿਆਂ ਦੇ ਮਾਮਲੇ ‘ਚ 500 ਡਾਲਰ ਦੀ ਅਦਾਇਗੀ ਕੀਤੀ ਗਈ। ਨਵੀਂ ਯੋਜਨਾ ਅਧੀਨ ਸਕੂਲ ਜਾਣ ਵਾਲੇ ਬੱਚਿਆਂ ਦੇ ਮਾਪੇ 31 ਮਾਰਚ 2023 ਤੱਕ ਅਰਜ਼ੀਆਂ ਦਾਖ਼ਲ ਕਰ ਸਕਦੇ ਹਨ।
ਸਿੱਖਿਆ ਮੰਤਰੀ ਸਟੀਫ਼ਨ ਵੱਲੋਂ ਐਜੂਕੇਸ਼ਨ ਕੁਆਲਿਟੀ ਐਂਡ ਅਕਾਊਂਟਬਿਲਟੀ ਦਫ਼ਤਰ ਦੇ ਤਾਜ਼ਾ ਅੰਕੜਿਆਂ ਦਾ ਜ਼ਿਕਰ ਵੀ ਕੀਤਾ ਗਿਆ, ਜਿਨ੍ਹਾਂ ਮੁਤਾਬਕ 6ਵੀਂ ਜਮਾਤ ਦੇ ਜ਼ਿਆਦਾਤਰ ਬੱਚੇ ਹਿਸਾਬ ਦੇ ਵਿਸ਼ੇ ‘ਚ ਸੂਬਾਈ ਮਿਆਰਾਂ ‘ਤੇ ਖਰੇ ਨਹੀਂ ਉਤਰ ਸਕੇ ਅਤੇ ਸਿਰਫ਼ 47 ਫ਼ੀਸਦੀ ਬੱਚਿਆਂ ਨੇ ਟੈਸਟ ਪਾਸ ਕੀਤਾ। ਸਟੀਫਨ ਲੈਚੇ ਨੇ ਕਿਹਾ ਕਿ ਜਦੋਂ ਬੱਚੇ ਕਲਾਸਾਂ ਤੋਂ ਦੂਰ ਹੋ ਜਾਂਦੇ ਹਨ ਤਾਂ ਲਾਜ਼ਮੀ ਤੌਰ ਤੇ ਉਨ੍ਹਾਂ ਦੀ ਕਾਰਗੁਜ਼ਾਰੀ ਪ੍ਰਭਾਵਿਤ ਹੁੰਦੀ ਹੈ। ਉਨ੍ਹਾਂ ਅੱਗੇ ਕਿਹਾ ਕਿ ਕਿੰਡਰਗਾਰਟਨ ਦੀ ਗਰੇਡ 2 ‘ਚ ਪੜ੍ਹਦੇ ਬੱਚਿਆਂ ਦੀ ਸਕ੍ਰੀਨਿੰਗ ਵੀ ਸ਼ੁਰੂ ਕੀਤੀ ਜਾ ਰਹੀ ਹੈ, ਤਾਂਕਿ ਜ਼ਰੂਰਤ ਮੁਤਾਬਕ ਕਦਮ ਉਠਾਏ ਜਾ ਸਕਣ।
Disclaimer: This article is provided for informational purposes only. The information should not be taken to represent the opinions, policy, or views of Global Punjab TV, nor any of its staff, employees, or affiliates.
