ਨਿਊਜ਼ ਡੈਸਕ: ਪੇਰੂ ਵਿੱਚ ਇੱਕ ਦਿਲ ਦਹਿਲਾਉਣ ਵਾਲਾ ਮਾਮਲਾ ਸਾਹਮਣੇ ਆਇਆ ਹੈ। ਪੁਰਾਤੱਤਵ-ਵਿਗਿਆਨੀਆਂ ਨੂੰ ਇੱਥੇ ਦਰਜਨਾਂ ਬੱਚਿਆਂ ਦੇ ਪਿੰਜਰ ਮਿਲੇ ਹਨ ਅਤੇ ਆਉਣ ਵਾਲੇ ਸਮੇਂ ਵਿੱਚ ਹੋਰ ਵੀ ਕਈ ਅਜਿਹੇ ਅਵਸ਼ੇਸ਼ ਮਿਲਣ ਦਾ ਖਦਸ਼ਾ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਇਨ੍ਹਾਂ ਬੱਚਿਆਂ ਨੂੰ ਬਲੀ ਦੇ ਕੇ ਮੌਤ ਦੇ ਘਾਟ ਉਤਾਰ ਦਿੱਤਾ ਗਿਆ ਸੀ। ਰਿਪੋਰਟਾਂ ਮੁਤਾਬਕ ਪਿੰਜਰਾਂ ਨੂੰ ਦੇਖ ਕੇ ਪਤਾ ਲੱਗਦਾ ਹੈ ਕਿ ਬੱਚਿਆਂ ਦੇ ਦਿਲ ਵੀ ਕੱਢੇ ਗਏ ਸਨ।
ਫਲੋਰੀਡਾ ਯੂਨੀਵਰਸਿਟੀ ਦੇ ਸਹਾਇਕ ਪ੍ਰੋਫੈਸਰ ਗੈਬਰੀਅਲ ਪ੍ਰੀਟੋ ਨੇ ਦੱਸਿਆ ਕਿ ਹੁਆਨਚਾਕੋ ਨੇੜੇ ਪੰਪਾ ਲਾ ਕਰੂਜ਼ ਵਿਖੇ ਖੁਦਾਈ ਕੀਤੀ ਗਈ ਸੀ, ਜਿੱਥੇ ਬੱਚਿਆਂ ਦੇ ਅਵਸ਼ੇਸ਼ ਮਿਲੇ ਹਨ। ਉਨ੍ਹਾਂ ਨੇ ਕਿਹਾ ਕਿ ਸਾਰੇ 76 ਪਿੰਜਰਾਂ ‘ਚ ਟਰਾਂਸਵਰਸਲ ਕਲੀਨ ਕੱਟ ਸਨ, ਜਿਸ ਤੋਂ ਪਤਾ ਲੱਗਦਾ ਹੈ ਕਿ ਸ਼ਾਇਦ ਪਿੰਜਰ ਨੂੰ ਖੋਲ੍ਹ ਕੇ ਦਿਲ ਨੂੰ ਬਾਹਰ ਕੱਢਿਆ ਗਿਆ ਸੀ।
ਰਿਪੋਰਟਾਂ ਮੁਤਾਬਕ ਪ੍ਰੋਫੈਸਰ ਨੇ ਈਮੇਲ ਰਾਹੀਂ ਦੱਸਿਆ ਕਿ ਬੱਚਿਆਂ ਨੂੰ ਪੂਰਬ ਵੱਲ ਪੈਰ ਕਰਕੇ ਇੱਕੋ ਦਿਸ਼ਾ ਵੱਲ ਦਫ਼ਨਾਇਆ ਹੋਇਆ ਹੈ। ਫਿਲਹਾਲ ਇਹ ਸਾਫ ਨਹੀਂ ਹੈ ਕਿ ਬਲੀ ਇਸ ਥਾਂ ‘ਤੇ ਦਿੱਤੀ ਗਈ ਸੀ ਜਾਂ ਨਹੀਂ। ਪੰਪਾ ਲਾ ਕਰੂਜ਼ ਵਿਖੇ ਕਈ ਸਾਲਾਂ ਤੋਂ ਖੁਦਾਈ ਚੱਲ ਰਹੀ ਹੈ। ਹੁਣ ਤੱਕ 323 ਬੱਚਿਆਂ ਦੇ ਪਿੰਜਰ ਮਿਲ ਚੁੱਕੇ ਹਨ। ਇਸ ਤੋਂ ਇਲਾਵਾ 137 ਹੋਰ ਬੱਚੇ ਅਤੇ ਤਿੰਨ ਬਾਲਗਾਂ ਦੇ ਕੰਕਾਲ ਵੀ ਮਿਲੇ ਹਨ। ਇਨ੍ਹਾਂ ਅਵਸ਼ੇਸ਼ਾਂ ‘ਚ ਵੀ ਇਹੀ ਪਾਇਆ ਗਿਆ ਸੀ ਕਿ ਬੱਚਿਆਂ ਦੇ ਦਿਲ ਕੱਢੇ ਗਏ ਹੋ ਸਕਦੇ ਸਨ।
ਪ੍ਰੋਫੈਸਰ ਪ੍ਰੀਟੋ ਨੇ ਕਿਹਾ ਕਿ ਹੁਣ ਤੱਕ ਦੀਆਂ ਪੁਰਾਤੱਤਵ ਖੋਜਾਂ ਦੇ ਆਧਾਰ ‘ਤੇ ਹੁਆਨਚਾਕੋ ਦੇ ਨੇੜ੍ਹੇ ਕਈ ਹੋਰ ਬੱਚਿਆਂ ਦੀ ਬਲੀ ਦਿੱਤੇ ਜਾਣ ਦਾ ਅੰਕੜਾ 1,000 ਤੋਂ ਵੱਧ ਹੋ ਸਕਦਾ ਹੈ।
Disclaimer: This article is provided for informational purposes only. The information should not be taken to represent the opinions, policy, or views of Global Punjab TV, nor any of its staff, employees, or affiliates.
