ਨਵੀਂ ਦਿੱਲੀ: ਦੁਨੀਆ ਦੇ ਮਸ਼ਹੂਰ ਪਨਾਮਾ ਪੇਪਰਜ਼ ਮਾਮਲੇ ‘ਚ ਬਾਲੀਵੁੱਡ ਅਦਾਕਾਰਾ ਐਸ਼ਵਰਿਆ ਰਾਏ ਦਿੱਲੀ ਦੇ ਲੋਕਨਾਇਕ ਭਵਨ ਵਿੱਚ ਈਡੀ ਸਾਹਮਣੇ ਪੇਸ਼ ਹੋਵੇਗੀ। ਪਨਾਮਾ ਪੇਪਰਜ਼ ਮਾਮਲੇ ‘ਚ ਭਾਰਤ ਦੇ ਲਗਭਗ 500 ਲੋਕ ਸ਼ਾਮਲ ਸਨ। ਇਨ੍ਹਾਂ ਵਿੱਚ ਨਾਮੀ ਅਦਾਕਾਰ, ਖਿਡਾਰੀ, ਕਾਰੋਬਾਰੀਆਂ ਦੇ ਨਾਮ ਸ਼ਾਮਲ ਹਨ। ਇਨ੍ਹਾਂ ਲੋਕਾਂ ‘ਤੇ ਟੈਕਸ ਚੋਰੀ ਦਾ ਦੋਸ਼ ਹਨ।
ਪਨਾਮਾ ਪੇਪਰਜ਼ ਮਾਮਲੇ ਦੀ ਲੰਬੇ ਸਮੇਂ ਤੋਂ ਜਾਂਚ ਚੱਲ ਰਹੀ ਹੈ, ਜਿਸ ‘ਚ ਦੇਸ਼ ਦੀਆਂ ਕਈ ਵੱਡੀਆਂ ਹਸਤੀਆਂ ਨੂੰ ਸ਼ਾਮਲ ਕੀਤਾ ਗਿਆ ਹੈ। ਇਸ ਤੋਂ ਪਹਿਲਾਂ ਬੀਤੇ ਮਹੀਨੇ ਅਭਿਸ਼ੇਕ ਬੱਚਨ ਵੀ ਈਡੀ ਦਫਤਰ ਪਹੁੰਚੇ ਸਨ। ਉਨ੍ਹਾਂ ਨੇ ਈਡੀ ਅਧਿਕਾਰੀਆਂ ਨੂੰ ਕੁਝ ਦਸਤਾਵੇਜ਼ ਵੀ ਸੌਂਪੇ ਹਨ। ਈਡੀ ਦੇ ਸੂਤਰਾਂ ਦੀ ਮੰਨੀਏ ਤਾਂ ਜਲਦ ਹੀ ਉਨ੍ਹਾਂ ਦੇ ਪਿਤਾ ਅਮਿਤਾਭ ਬੱਚਨ ਨੂੰ ਵੀ ਇਸ ਮਾਮਲੇ ‘ਚ ਈਡੀ ਨੋਟਿਸ ਦੇ ਕੇ ਬੁਲਾਉਣ ਜਾ ਰਹੀ ਹੈ।
ਦੱਸਣਯੋਗ ਹੈ ਕਿ 2016 ਵਿੱਚ, ਯੂਕੇ ਵਿੱਚ ਪਨਾਮਾ ਅਧਾਰਤ ਇੱਕ ਲਾਅ ਫਰਮ ਦੇ 11.5 ਕਰੋੜ ਟੈਕਸ ਦਸਤਾਵੇਜ਼ ਲੀਕ ਹੋਏ ਸਨ। ਜਿਸ ਵਿੱਚ ਬੱਚਨ ਪਰਿਵਾਰ ਦਾ ਨਾਮ ਵੀ ਸ਼ਾਮਲ ਹੈ। ਇਕ ਰਿਪੋਰਟ ਮੁਤਾਬਕ ਅਮਿਤਾਭ ਬੱਚਨ ਨੂੰ 4 ਕੰਪਨੀਆਂ ਦਾ ਡਾਇਰੈਕਟਰ ਬਣਾਇਆ ਗਿਆ ਸੀ। ਇਨ੍ਹਾਂ ਵਿੱਚੋਂ ਤਿੰਨ ਬਹਾਮਾਸ ਵਿੱਚ ਸਨ, ਜਦੋਂ ਕਿ ਇੱਕ ਵਰਜਿਨ ਟਾਪੂ ਵਿੱਚ ਸੀ। ਇਹ 1993 ਵਿੱਚ ਬਣਾਏ ਗਏ ਸਨ। ਇਨ੍ਹਾਂ ਕੰਪਨੀਆਂ ਦੀ ਪੂੰਜੀ 5 ਹਜ਼ਾਰ ਤੋਂ 50 ਹਜ਼ਾਰ ਡਾਲਰ ਦੇ ਵਿਚਕਾਰ ਸੀ ਪਰ ਇਹ ਕੰਪਨੀਆਂ ਉਨ੍ਹਾਂ ਜਹਾਜ਼ਾਂ ਦਾ ਕਾਰੋਬਾਰ ਕਰ ਰਹੀਆਂ ਸਨ, ਜਿਨ੍ਹਾਂ ਦੀ ਕੀਮਤ ਕਰੋੜਾਂ ਰੁਪਏ ਸੀ।
ਐਸ਼ਵਰਿਆ ਨੂੰ ਪਹਿਲਾਂ ਇੱਕ ਕੰਪਨੀ ਦੀ ਡਾਇਰੈਕਟਰ ਬਣਾਇਆ ਗਿਆ ਸੀ। ਬਾਅਦ ਵਿੱਚ ਉਸਨੂੰ ਕੰਪਨੀ ਦਾ ਸ਼ੇਅਰ ਹੋਲਡਰ ਐਲਾਨਿਆਂ ਗਿਆ। ਇਸਦਾ ਮੁੱਖ ਦਫਤਰ ਵਰਜਿਨ ਟਾਪੂ ਵਿੱਚ ਸੀ। ਐਸ਼ਵਰਿਆ ਤੋਂ ਇਲਾਵਾ ਪਿਤਾ ਕੇ. ਰਾਏ, ਮਾਂ ਵ੍ਰਿੰਦਾ ਰਾਏ ਅਤੇ ਭਰਾ ਆਦਿਤਿਆ ਰਾਏ ਵੀ ਕੰਪਨੀ ਵਿੱਚ ਉਸਦੇ ਹਿੱਸੇਦਾਰ ਸਨ।
