ਦੇਸੀ ਚਾਹ ਨੇ ਬਦਲੀ ਅਮਰੀਕੀ ਮਹਿਲਾ ਦੀ ਕਿਸਮਤ, ਵੇਚ ਕੇ ਕਮਾ ਰਹੀ ਹੈ ਕਰੋੜਾਂ ਰੁਪਏ

ਕੋਲੋਰਾਡੋ : ਕਿਹਾ ਜਾਂਦਾ ਹੈ ਕਿ ਚਾਹ ਪ੍ਰੇਮੀ ਸਾਰੇ ਭਾਰਤ ਵਿੱਚ ਹੀ ਮੌਜੂਦ ਹਨ, ਪਰ ਹੌਲੀ-ਹੌਲੀ ਹੁਣ ਇਸ ਨੂੰ ਪੀਣ ਵਾਲੇ ਪੱਛਮ ਵਿੱਚ ਵੀ ਆਪਣੀ ਜਗ੍ਹਾ ਨੂੰ ਮਜ਼ਬੂਤ ਕਰ ਰਹੇ ਹਨ। ਚਾਹ ਵੇਚ ਕੇ ਲੱਖਪਤੀ ਬਣਨ ਵਾਲਿਆਂ ਦੀ ਭਾਰਤ ਵਿੱਚ ਕੋਈ ਕਮੀ ਨਹੀਂ ਹੈ, ਹੈਰਾਨੀ ਦੀ ਗੱਲ ਤਾਂ ਉਦੋਂ ਹੈ ਜਦੋਂ ਕੋਈ ਵਿਦੇਸ਼ੀ ਦੇਸੀ ਚਾਹ ਵੇਚ ਕੇ ਕਰੋੜਪਤੀ ਬਣ ਜਾਵੇ। ਜੀ ਹਾਂ, ਅਮਰੀਕਾ ਵਿੱਚ ਇੱਕ ਮਹਿਲਾ ਭਾਰਤੀ ਚਾਹ ਦਾ ਦੇਸੀ ਸਵਾਦ ਵੇਚ ਕੇ ਅੱਜ ਕਰੋੜਾਂ ਰੁਪਏ ਕਮਾ ਰਹੀ ਹੈ।

ਅਮਰੀਕਾ ਦੀ ਬਰੂਕ ਐਡੀ ਨਾਮਕ ਔਰਤ ਭਾਰਤੀ ਚਾਹ ਵੇਚ ਕੇ ਬਹੁਤ ਪੈਸਾ ਕਮਾ ਰਹੀ ਹੈ। ਕੋਲੋਰਾਡੋ ‘ਚ ਸਥਿਤ ਕਾਰੋਬਾਰੀ ਬਰੂਕ ਐਡੀ ਚਾਹ ਦਾ ਕਾਰੋਬਾਰ ਕਰਦੀ ਹੈ। ਉਸਨੂੰ ਅਮਰੀਕਾ ਦਾ ‘ਚਾਹ ਵਾਲਾ’ ਵੀ ਕਿਹਾ ਜਾਂਦਾ ਹੈ।

ਬਰੂਕ 2002 ਵਿਚ ਭਾਰਤ ਆਈ ਸੀ ਜਦੋਂ ਉਸਨੇ ਪਹਿਲੀ ਵਾਰ ਚਾਹ ਦਾ ਸੁਆਦ ਚੱਖਿਆ ਸੀ। ਉਦੋਂ ਤੋਂ, ਉਹ ਹਰ ਥਾਂ ‘ਤੇ ਇਸ ਸਵਾਦ ਦੀ ਭਾਲ ਕਰ ਰਹੀ ਸੀ। ਕੋਲੋਰਾਡੋ ਵਾਪਸ ਪਹੁੰਚਣ ਤੋਂ ਬਾਅਦ ਵੀ ਉਸ ਨੂੰ ਕਈ ਥਾਵਾਂ ‘ਤੇ ਚਾਹ ਮਿਲੀ ਪਰ ਕਿਤੇ ਵੀ ਉਸਨੂੰ ਭਾਰਤ ਦਾ ਸਵਾਦ ਨਹੀਂ ਮਿਲਿਆ। ਉਸ ਤੋਂ ਬਾਅਦ ਉਹ ਖੁਦ ਚਾਹ ਬਣਾਉਣ ਲੱਗੀ।

ਸਾਲ 2006 ਵਿਚ, ਉਸਨੇ ਆਪਣੀ ਕਾਰ ਵਿਚ ਚਾਹ ਵੇਚਣੀ ਸ਼ੁਰੂ ਕੀਤੀ। ਉਹ ਚਾਹ ਬਣਾਉਂਦੀ ਅਤੇ ਇਸਨੂੰ ਆਪਣੀ ਕਾਰ ਵਿਚ ਰੱਖਦੀ, ਅਤੇ ਫਿਰ ਇਸ ਨੂੰ ਹਰ ਜਗ੍ਹਾ ਵੇਚਦੀ। ਸਾਲ 2007 ਵਿਚ, ਉਸਨੇ ਆਪਣੀ ਕੰਪਨੀ ਲਈ ਇਕ ਵੈਬਸਾਈਟ ਬਣਾਈ ਤਾਂ ਜੋ ਵਧੇਰੇ ਲੋਕ ਉਸ ਨਾਲ ਜੁੜ ਸਕਣ। ਉਸਨੇ ਇੱਕ ਸਾਲ ਬਾਅਦ ਆਪਣੀ ਨੌਕਰੀ ਚਾਹ ਦੇ ਕਾਰੋਬਾਰ ਲਈ ਛੱਡ ਦਿੱਤੀ। ਹੌਲੀ ਹੌਲੀ ਕੰਪਨੀ ਨੇ ਵਿਕਾਸ ਕਰਨਾ ਸ਼ੁਰੂ ਕੀਤਾ ਅਤੇ ਇੱਕ ਹੀ ਸਾਲ ਵਿੱਚ ਉਨ੍ਹਾਂ ਨੂੰ ਚੰਗਾ ਮੁਨਾਫਾ ਹੋਇਆ ਤੇ ਰਿਪੋਰਟਾਂ ਅਨੁਸਾਰ ਸਾਲ 2018 ਵਿੱਚ ਉਨ੍ਹਾਂ ਦੀ ਕੰਪਨੀ ਨੂੰ ਲਗਭਗ 45.5 ਕਰੋੜ ਰੁਪਏ ਦਾ ਅਨੁਮਾਨਿਤ ਮੁਨਾਫਾ ਹੋਇਆ।