ਮੁੰਬਈ: ਹਿੰਦੀ ਸਿਨੇਮਾ ਦੀ ਮਸ਼ਹੂਰ ਅਦਾਕਾਰਾ ਕਾਮਿਨੀ ਕੌਸ਼ਲ ਦਾ ਅੱਜ 98 ਸਾਲ ਦੀ ਉਮਰ ਵਿੱਚ ਦੇਹਾਂਤ ਹੋ ਗਿਆ ਹੈ। ਕਾਮਿਨੀ ਕੌਸ਼ਲ ਹਿੰਦੀ ਸਿਨੇਮਾ ਦੀਆਂ ਸਭ ਤੋਂ ਬਜ਼ੁਰਗ ਅਭਿਨੇਤਰੀਆਂ ਵਿੱਚੋਂ ਇੱਕ ਸੀ। ਉਹ ਆਖਰੀ ਵਾਰ ਆਮਿਰ ਖਾਨ ਅਤੇ ਕਰੀਨਾ ਕਪੂਰ ਸਟਾਰਰ ਫਿਲਮ ਲਾਲ ਸਿੰਘ ਚੱਢਾ ਵਿੱਚ ਨਜ਼ਰ ਆਈ ਸੀ।
ਕਾਮਿਨੀ ਕੌਸ਼ਲ 1940 ਦੇ ਦਹਾਕੇ ਦੀਆਂ ਸਭ ਤੋਂ ਸਫਲ ਅਭਿਨੇਤਰੀਆਂ ਵਿੱਚੋਂ ਇੱਕ ਸੀ। ਉਹ 1947 ਅਤੇ 1948 ਵਿੱਚ ਬਾਕਸ ਆਫਿਸ ਇੰਡੀਆ ਦੀ ਚੋਟੀ ਦੀਆਂ ਅਭਿਨੇਤਰੀਆਂ ਦੀ ਸੂਚੀ ਵਿੱਚ ਪਹਿਲੇ ਸਥਾਨ ‘ਤੇ ਸੀ। ਉਸਨੂੰ 2022 ਵਿੱਚ, ਆਉਟਲੁੱਕ ਇੰਡੀਆ ਦੀਆਂ 75 ਸਭ ਤੋਂ ਵਧੀਆ ਬਾਲੀਵੁੱਡ ਅਭਿਨੇਤਰੀਆਂ ਵਿੱਚ ਸ਼ਾਮਲ ਕੀਤਾ ਗਿਆ ਸੀ।
ਦੱਸ ਦਈਏ ਕਿ ਕਾਮਿਨੀ ਕੌਸ਼ਲ ਨੇ ਸਾਲ 1946 ‘ਚ ਫਿਲਮ ‘ਨੀਚਾ ਨਗਰ’ ਨਾਲ ਬਾਲੀਵੁੱਡ ‘ਚ ਐਂਟਰੀ ਕੀਤੀ ਸੀ। ਆਪਣੇ ਸੱਤ ਦਹਾਕਿਆਂ ਦੇ ਫਿਲਮੀ ਕਰੀਅਰ ਵਿੱਚ, ਕਾਮਿਨੀ ਕੌਸ਼ਲ ਨੇ ਦੋ ਭਾਈ, ਸ਼ਹੀਦ, ਨਦੀਆ ਕੇ ਪਾਰ, ਜਿੱਦੀ, ਸ਼ਬਨਮ, ਪਾਰਸ, ਉਪਕਾਰ, ਪੂਰਬ ਔਰ ਪਛਮ, ਰੋਟੀ- ਕਪੜਾ ਔਰ ਮਕਾਨ ਵਰਗੀਆਂ ਫਿਲਮਾਂ ਵਿੱਚ ਕੰਮ ਕੀਤਾ ਹੈ। ਇਸ ਤੋਂ ਇਲਾਵਾ ਉਹ ਹਰ ਦਿਲ ਜੋ ਪਿਆਰ ਕਰੇਗਾ, ਚੋਰੀ ਚੋਰੀ, ਲਗਾ ਚੁਨਰੀ ਮੇਂ ਦਾਗ, ਚੇਨਈ ਐਕਸਪ੍ਰੈਸ, ਕਬੀਰ ਸਿੰਘ ਅਤੇ ਲਾਲ ਸਿੰਘ ਚੱਢਾ ਵਰਗੀਆਂ ਫਿਲਮਾਂ ਵਿੱਚ ਵੀ ਨਜ਼ਰ ਆ ਚੁਕੀ ਹੈ।
ਰਿਪੋਰਟਸ ਅਨੁਸਾਰ ਕਾਮਿਨੀ ਦਾ ਬਚਪਨ ਘੋੜਸਵਾਰੀ, ਭਰਤਨਾਟਿਅਮ, ਤੈਰਾਕੀ ਅਤੇ ਸ਼ਿਲਪਕਾਰੀ ਸਮੇਤ ਕਈ ਹੁਨਰ ਕਲਾ ਸਿੱਖਣ ਵਿੱਚ ਬੀਤਿਆ। ਉਸਨੇ ਰੇਡੀਓ ਨਾਟਕਾਂ ਅਤੇ ਥੀਏਟਰ ਵਿੱਚ ਵੀ ਹਿੱਸਾ ਲਿਆ, ਜਿਸਨੇ ਉਸ ਦੇ ਕੁਦਰਤੀ ਅਦਾਕਾਰੀ ਅਤੇ ਆਵਾਜ਼-ਸੰਚਾਲਨ ਦੇ ਹੁਨਰ ਵਿਕਸਤ ਕਰਨ ਵਿੱਚ ਸਹਾਇਤਾ ਕੀਤੀ। ਕਾਮਿਨੀ ਦੇ ਪਿਤਾ, ਸ਼ਿਵਰਾਮ ਕਸ਼ਯਪ, ਇੱਕ ਮਸ਼ਹੂਰ ਬਨਸਪਤੀ ਵਿਗਿਆਨੀ ਸਨ ਜਿਨ੍ਹਾਂ ਨੇ ਲਾਹੌਰ ਵਿੱਚ ਬਨਸਪਤੀ ਵਿਗਿਆਨ ਵਿਭਾਗ ਦੀ ਸਥਾਪਨਾ ਕੀਤੀ ਸੀ ਅਤੇ ਭਾਰਤੀ ਵਿਗਿਆਨਕ ਜਗਤ ਵਿੱਚ ਇੱਕ ਪ੍ਰਮੁੱਖ ਹਸਤੀ ਸਨ।
ਨੋਟ: ਪੰਜਾਬੀ ਦੀਆਂ ਖ਼ਬਰਾਂ ਪੜ੍ਹਨ ਲਈ ਤੁਸੀਂ ਸਾਡੀ ਐਪ ਨੂੰ ਡਾਊਨਲੋਡ ਕਰ ਸਕਦੇ ਹੋ। ਜੇ ਤੁਸੀਂ ਵੀਡੀਓ ਵੇਖਣਾ ਚਾਹੁੰਦੇ ਹੋ ਤਾਂ Global Punjab TV ਦੇ YouTube ਚੈਨਲ ਨੂੰ Subscribe ਕਰੋ। ਤੁਸੀਂ ਸਾਨੂੰ ਫੇਸਬੁੱਕ, ਟਵਿੱਟਰ ‘ਤੇ ਵੀ Follow ਕਰ ਸਕਦੇ ਹੋ। ਸਾਡੀ ਵੈੱਬਸਾਈਟ https://globalpunjabtv.com/ ‘ਤੇ ਜਾ ਕੇ ਵੀ ਹੋਰ ਖ਼ਬਰਾਂ ਨੂੰ ਪੜ੍ਹ ਸਕਦੇ ਹੋ।
